Ayxan Abbasov: “Rəqib xal qazansaydı...”

"Vacib 3 xal qazandıq. Rəqib xal qazansaydı, bizə çox çətin olacaqdı. İkinci hissədə futbolçularımız üstün, taktiki cəhətdən düzgün oynadılar. Komandamı və azarkeşlərimizi təbrik edirəm. Sonadək vuruşacağıq".

Futbolxeber.az saytının məlumatına görə, bu sözləri "Sumqayıt"ın baş məşqçisi Ayxan Abbasov Azərbaycan Premyer Liqasının 23-cü turunda evdə "Qəbələ"yə 2:0 hesabı ilə qalib gəldikləri oyundan sonra keçirilən mətbuat konfransında deyib.

O, bu mövsüm ilk dəfə "Qəbələ" üzərində qələbə qazandıqlarını bildirib. Baş məşqçi "Qarabağ"a 1:4 hesabı ilə uduzmalarına rəğmən, yaxşı oyun sərgilədiklərini söyləyib: "Belə məğlubiyyətlərdən sonra komandanın toparlanması, ruhunun yerində olması önəmlidir. Məncə, bunun öhdəsindən layiqincə gəldik".

Abbasov Camaləddin Xocaniyazovun vəziyyətinə sabah aydınlıq gələcəyini diqqətə çatdırıb: "Ümid edirik ki, yaxın zamanda bizimlə olacaq".

Baş məşqçi Rəhim Sadıxovun Ukrayna klubundan təklif alması xəbərinə də aydınlıq gətirib: "Onun bizimlə hələ müqaviləsi var. Bu haqda məlumatım yoxdur. Hansı klub istəsə, ilk növbədə, bizə müraciət etməlidir".

Abbasovun sözlərinə görə, komandada kimin qalıb-qalmaması büdcədən asılıdır: "Bu gün hansısa futbolçuya rahatlıqla qalmasını təklif edə bilmirik. Çempionat bitdikdən sonra rəhbərliklə söhbət edəcəyik".