“Bazar günü “Qarabağ” barədə hazır material əldə edəcəyik”

"Meydanda etməli olduğumuz işi gördük. Bəzi hallarda istədiyim kimi oynadıq, amma çox çalışmalı olduğumuz məqamlar var”.

Futbolxeber.az saytının məlumatına görə,  bu sözləri “Legiya”nın baş məşqçisi Çeslav Mixneviç Avropa Liqasının 3-cü təsnifat mərhələsində Kosovo "Drita"sını məğlub etdikləri oyundan (2:0) sonra mətbuat konfransında deyib.

Bir neçə gün əvvəl "Legiya"ya baş məşqçi təyin edilən 50 yaşlı mütəxəssis artıq pley-offda "Qarabağ"la keçiriləcək görüşü düşündüklərini bildirib: “Pley-offa daha yaxşı hazırlaşmalıyıq. “Qarabağ”ı diqqətlə öyrənməliyik. Düşünürəm ki, bazar günü rəqibimiz barədə hazır material əldə edəcəyik. Məqsədimiz qrupa vəsiqə qazanmaqdır. Polşa çempionatındakı görüşümüzün təxirə salınması “Qarabağ”la matça hazırlaşmaq baxımından bizə əlavə vaxt qazandırdı. Bundan da maksimum yararlanacağıq. Nəticə ya xeyrimizə işləyəcək, ya da yolunda olmayan nələrinsə olduğunu ortaya çıxaracaq”.

Qeyd edək ki, “Legiya” - “Qarabağ” oyunu oktyabrın 1-də Polşanın paytaxtı Varşavada keçiriləcək. Qalib gələn komanda Avroliqanın qrup mərhələsinə yüksələcək.