I divizionun taleyi necə olacaq?

Premyer Liqa klubları bu gündən məşqləri bərpa ediblər, iyunun 21-dən etibarən isə oyunlar start götürəcək.

Futbolxeber.az saytının məlumatına görə, yüksək liqadan fərqli olaraq, I divizionun taleyi hələ ki qeyri-müəyyəndir.

I divizionda mövsümün başa çatdırılmayacağı barədə iddialar səslənsə də, indiki məqamda bu, həqiqəti əks etdirmir. Çünki çempionatın taleyi ilə bağlı hələ ki yekun qərar açıqlanmayıb.

Real durumu göz önünə gətirərək, iddia etmək olar ki, I divizionda mövsüm sona çatdırılmayacaq. Əslində, yarışın erkən bitirilməsi, hazırkı turnir cədvəlinə uyğun qalibin elan olunması istisna olunmur və bu, real görünür. Lakin çempionatı yarımçıq dayandırmaq AFFA və ya PFL-in saləhiyyəti çərçivəsində olan məsələ deyil. Bunun üçün İcraiyyə Komitəsi qərar qəbul etməlidir.

Qeyd edək ki, hazırda I divizionda lider “Turan Tovuz”dur. Aktivində 37 xal olan Tovuz klubu ən yaxın izləyicisi, 1 oyun az keçirdiyi “Səbail-2”-ni 1 xal qabaqlayır. Üçüncü pillədə isə 35 xala malik “Zaqatala” qərarlaşıb. Ehtimal etdiyimiz kimi olsa, o zaman İcraiyyə Komitəsinin qərarına əsasən, “Turan Tovuz” çempion elan olanacaq. Gümüş medallar “Səbail-2”yə, bürünc medallar isə “Zaqatala”ya qismət olacaq.

Əlavə edək ki, koronavirus səbəbindən Fransa, Belçika kimi ölkələrdə məhz bu cür qərar qəbul olunub, mövsüm başa çatdırılmayıb və hazırkı turnir cədvəlinə əsasən qalib və medalçılar elan olunub.