28 futbolçu üçün ödənilməyən - “Bakı”nın göyə sovrulan milyonları

Koronavirus dövründə son günlər futbolumuzda əsas müzakirə olunan məsələlərdən biri də “Bakı” Futbol Klubunun bazasında söküntü işlərinə başlanmasıdı. Düzdür, məlum səbəblərdən əvvəl o bazanın qapısından içəri daxil olmaq üçün növbəyə dayananların çoxu bu məsələyə biganə qaldılar. Kimlərinsə xoşuna gəlməz deyə məsələ ilə bağlı fikir bildirməyə, nəsə yazmağa cürət etmədilər. Amma ölkənin bir çox aparıcı portalları, bəzi kanallar yaxın keçmişdə Azərbaycanın müxtəlif yaş qrupu üzrə mili komandaları üçün ən çox futbolçu hazırlayan klubun bazasının dağıdılmasına biganə qalmadılar. Hazırda baza ətrafında müzakirələr gedir və qarşıdakı günlərdə “Bakı” Futbol Klubunun rəhbərliyinin məsələ ilə bağlı geniş açıqlama verəcəyi gözlənilir.

Lakin bu yazıda toxunmaq istədiyimiz məqam başqadı. Bu günlərdə, daha da dəqiqləşdirsək Amin Seyidovun “Sabah”a transferindən sonra bir məqam diqqətimizi çəkdi. Həmkarlarımızdan birinin sosial şəbəkədə qeyd etdiyi kimi, “Qəbələ” təxminən son ilyarımda 3 yetirməsinin - Hacıağa Hacılı (“Qarabağ”), Bəhlul Mustafazadə və Amin Seyidovun (hər ikisi “Sabah”) satışından təxminən yarım milyon manat pul əldə edib. Futbol klubu üçün yarım milyon kiçik rəqəm kimi görünə bilər. Lakin Azərbaycan reallığında bu, böyük uğurdu. Çünki bizim klublar adətən futbolçu satışından gəlir əldə etmirlər. Təbii ki, tək-tük istisnalar olub. Ancaq “Qəbələ” artıq bu işi sistem halına salıb və son ilyarımda klubun 3 yetirməsinin satışından yarım milyon manat qazanması uğur sayılmalıdı.

Həmin bu yarım milyon məsələsi ilə “Bakı”nın bazasının sökülməsi təxminən eyni vaxta düşdü. Bir anlıq düşünün: eyni mövqedə “Bakı” olsaydı, klub yetirmələrinin satışından nə qədər gəlir əldə edərdi? Təbii ki, qat-qat çox.

Adicə cari mövsümə diqqət edək. Apardığımız kiçik araşdırma nəticəsində məlum oldu ki, cari mövsümün ikinci yarısında Premyer Liqanın 6 klubunun heyətində ümumilikdə “Bakı”nın 15 yetirməsi yer alıb:

“Qarabağ” - 3 oyunçu

Mahir Emreli, İsmayıl İbrahimli, Nicat Mehbalıyev

“Neftçi” - 3 oyunçu

Aqil Məmmədov, Rəhman Hacıyev, Namiq Ələsgərov

“Səbail” - 2 oyunçu

Elxan Əhmədov, Vüqar Bəybalayev

“Zirə” - 3 oyunçu

Nicat Süleymanov, Rauf Hüseynli, Ağarəhim Kərimov

“Sumqayıt” - 2 oyunçu

Şəhriyar Əliyev, Vüqar Mustafayev

“Sabah” - 2 oyunçu

Vadim Abdullayev, Şakir Seyidov

Bu gün Mahir Emreli və İsmayıl İbrahimli “Qarabağ”da, Aqil Məmmədov, Namiq Ələsgərov, Rəhman Hacıyev “Neftçi"də, Nicat Süleymanov “Zirə”də, Şəhriyar Əliyev “Sumqayıt”da, Şakir Seyidov “Sabah”da aparıcı futbolçulardı. Bu oyunçuların hər birinin satışını “Bakı” reallaşdırsaydı, klubun qazancı yüz minlər yox, milyon həddində olardı.

Premyer Liqa ilə yanaşı, bu gün I divizionun da əksər klublarında “Bakı”nın yetirmələrinə rast gəlmək mümkündü. Xüsusən də, Premyer Liqa klublarının əvəzedici heyətində yer alan 2000, 2001-ci il təvəllüdlü futbolçuları qeyd etmək olar ki, böyük ehtimalla, onlar yaxın gələcəkdə əsas heyətə də cəlb olunacaqlar.

“Bakı”nın cari mövsüm I divizionda çıxış edən yetirmələri:

“Turan Tovuz” - 1 oyunçu 

Səbayel Bağırov

“Kəpəz” - 1 oyunçu

Tural Qürbətov

MOİK - 1 oyunçu

Fərid Nadirov

“Zaqatala” - 2 oyunçu

Famil Camalov, Ülvi Quliyev

“Zirə-2” - 2 oyunçu

Kənan Cəfərov, Tapdıq Əhmədov

“Sabah-2” - 2 oyunçu

Cavid Nəcizadə, Hüseynəli Quliyev

“Qarabağ-2” - 2 oyunçu

Kamran Məmmədov, Ayhan Arazlı

“Keşlə-2” - 2 oyunçu

Riyad Abbaszadə, Elmir Rəhimzadə

Siyahıdan da göründüyü kimi, bu 28 futbolçu təkcə elə cari mövsümün ikinci yarısında adı klubların iştirak ərizəsinə düşənlərdi. “Bakı”nın yetirmələrinin də, onların xidmətindən istifadə edən Premyer Liqa klublarının da sayı əvvəlki illərdə daha çox olub. “Bakı”nın yetirmələrindən hazırda Nurlan Novruzov Estoniyada, Salman Altuxanov, Umar Akmurzayev, Yusif Hakimov Türkiyədə, Elməddin Məmmədov Moldovada legioner həyatı yaşayır.

Eləcə də Bəxtiyar Soltanov, Azad Kərimov, Hacı Əhmədov, Elşad Manafov, Valeh Seyidov və hazırda adını xatırladığımız onlarla “Bakı”nın yetirməsi müxtəlif illərdə Premyer Liqa klublarının uğuru üçün çalışıblar. Amma bütün bunlardan “Bakı” heç bir qazanc əldə etməyib. Halbuki o futbolçuların yetişməsi üçün milyonlarla vəsait xərclənib. Təkcə elə “Bakı” Futbol Klubunun təlim-məşq bazasının inşası üçün 29 milyon manat xərcləndiyini xatırlamaq kifayət edər.

FUTBOLXEBER.AZ