Samir Abasov: "Danışmaq çətindir"

"Danışmaq çətindir. Oyunumuz alınmadı, çox pis mübarizə apardıq. Təzyiq altındayıq, məğlub olduqdan sonra vəziyyətimiz daha da pis olur. Bizə bir qələbə lazımdır, ancaq bunu qazanmaq üçün vaxta ehtiyacımız var”.

Futbolxeber.az saytının məlumatına görə, bu sözləri “Zirə”nin baş məşqçisi Samir Abasov Topaz Premyer Liqanın 6-cı turunda “Sumqayıt”a uduzduqları oyundan (0:1) sonra keçirdiyi mətbuat konfransında deyib.

O, məğlubiyyəti belə şərh edib: “Futbolçular oyunda nəyə qadir olduqlarını göstərməlidir. Aleksandr Dedovdan narazı idim, buna görə ehtiyatda idi. Bu gün Mirsahib Abbasova şans verdik, yoxladıq. Mirsahib özünü daim ehtiyatda qalmağa öyrəşdirib. Ondan çox şey gözləyirdik, lakin istədiyimizi əldə edə bilmədik”.

Komandanın ardıcıl uğursuz çıxışlarından danışan baş məşqçi qışa qədər gözləmək lazım olduğunu bildirib: “Komandamızın gələcəyi var, rəhbərliyimiz bizə dəstək olur. Komandaya yaxın olan adamları, azarkeşləri başa düşürəm. İnanıram ki, yaxşı vəziyyətə gələcəyik. Bəzi oyunçularımız çətinlik çəkirlər. İndiki vaxtda radikal addım atmaq düzgün deyil. Qışa qədər səbr etməli, sonra fikirləşməliyik".