"Neftçi"yə hazırkı transferlərlə avrokuboklarda nəsə etmək çətin olacaq"

“Neftçi”nin sabiq futbolçusu Fərid Quliyev komandanın yeni baş məşqçisi və yeni transferləri haqda danışıb.

Futbolxeber.az saytına açıqlama verən “ağ-qaralar”ın sabiq forvardı hazırkı transferlərlə nəsə etməyin çətin olduğunu deyib: “Tərlan Əhmədovun göndəriləcəyi və yeni baş məşqçinin gələcəyi gözlənilirdi. Məncə, baş məşqçinin italiyalı və ya azərbaycanlı olması o qədər də önəmli deyil. Komandaya dəvət olunacaq oyunçulardan çox şey asılı olacaq. Məncə, Roberto Bordin yerli oyunçulardan razı qalmayacaq. Onun üçün çox çətin olacaq.

Yeni transferlər haqda nə demək olar? Kiminsə ünvanına nəsə demək istəməzdim. Ancaq hazırkı transferlərlə avrokuboklarda nəsə etmək çox çətin olacaq. Yerli çempionatda isə bəlkə də ilk üçlüyə düşdülər. Mən qarşıdakı mövsüm “Neftçi”nin çempion olmasını istəyirəm. Artıq zamanı gəlib”.

“Neftçi”nin ən yaxşı dönəmində hücum xəttində yer almış Fərid Quliyevin fikrincə, komanda daha bir neçə transfer etməlidi: “Neftçi”yə hələ də transfer lazımdı. Hazırda bu komanda üçün çox vacibdi. Şəxsən mən Baqali Dabonu sırf hücumçu kimi görmürəm”.