“Hakimin qərarı düzgün deyildi”

“Qəbələ”nin yarımmüdafiəçisi Filip Ozobiç “Anderlext”lə oyundan sonra Futbolxeber.az saytına müsahibə verib.

- 1:3 hesablı məğlubiyyətin səbəbini necə izah edə bilərsən?

- “Anderlext”ə qarşı yaxşı oynadıq. Əvvəldən məqsədimiz qələbə qazanmaq idi. Təəssüf ki, oyunun sonluğu bizim üçün uğursuz alındı.

- Demək olar ki, qırılma nöqtəsi Rikardinyonun ikinci penaltini qaçırması oldu?

- Belə demək olar. İkinci penaltini vursaydıq, oyunun axarı da fərqli alınacaqdı. Önə keçsəydik, qələbə qazanmaq şansımız daha çox artacaqdı.

- İkinci penaltinin təkrar vurulmasına səbəb olan futbolçu kim idi?

- Cərimə meydançasına kimin daxil olduğunu görmədim. Çünki fikrim penaltidə idi. Fikrimcə, hakimin qərarı düzgün deyildi. Onda gərək bütün penaltilər təkrar yerinə yetirilsin.

- Belə çıxır ki, “Qəbələ” qrup mərhələsini xalsız başa vuracaq?

- Dəqiq bir söz demək olmur. “Maynts”la oyunda qələbə qazanmaq istəyirik. Əslində, “Anderlext”ə qarşı yaxşı oynadıq. Sadəcə, bəxtsizlik sözünü dedi və xal qazana bilmədik.

- Tribunaların boş olması sizə necə təsir etdi?

- Buna təəssüflənməmək olmur. Həqiqətən də çox az azarkeş gəlmişdi. Ancaq etiraf edim ki. Bu gün tribunalarda yer alan azarkeşlər heç də peşman olmadılar. Onlar maraqlı oyun izlədilər.

- “Qarabağ”la oyuna qədər bərpa oluna biləcəksiz?

- Çalışacağıq, çünki bizi çox vacib və əhəmiyyətli oyun gözləyir. Həmin oyunda mütləq qələbə qazanmalıyıq.

- Bu oyundan əvvəl Roman Qiqorçuk açıqlama verdi ki, “Qarabağ” üzərində qələbə “Anderlext”lə matçdan daha vacibdi. Onun bu fikri ilə razısan?

- Əlbəttə, razıyam. Avropa Liqasında onsuz da şansımız qalmayıb. Amma çempion olmaq üçün mütləq qələbə qazanmalıyıq.

- Dabonun yoxluğu oyununuza nə dərəcədə təsir edəcək?

- Onun yoxluğu bizim üçün ciddi itkidi. Məncə, Dabosuz bizə çox çətin olacaq.