“Zirə”nin yarımmüdafiəçisi: “Avroliqaya gedib-getməyəcəyimizlə maraqlanmırıq”

“Oyunun ağır keçəcəyini gözləyirdik. Öz meydanımızda çıxış edirdik. Bu matçda 3 xal qazanmaq bizim üçün çox vacib idi”. Futbolxeber.az saytına müsahibəsində bu sözləri “Zirə”nin yarımmüdafiəçisi Təmkin Xəlilzadə deyib.

Gənc futbolçu “Xəzər Lənkəran”ı 1:0 hesabı ilə məğlub etdikləri görüşdə çətinliklə üzləşmələrinin səbəbini belə izah edib: “Rəqib döyüşkən kollektiv idi. Komandamız qol vurmaq üçün tələsirdi. Ona görə də ilk yarıda rəqib qapısına yol tapa bilmədik. Fasilədə baş məşqçimiz səbrli oynamağımızı istədi. Nəticədə də istəyimizə çatdıq”.

Xəlilzadə ikinci hissədə meydana çıxmasında problem görmür: “Bəzi oyunlarda meydana çıxmasam da, “Xəzər Lənkəran”la görüşdə oynamaq şansı qazandım. Meydanda olduğum müddətdə komandam üçün əlimdən gələni etdim. Məşqçinin qərarına hörmətlə yanaşıram”.

Sonda avrokuboklarla bağlı sualı “Zirə”nin yarımmüdafiəçisi qısa olaraq belə cavablandırıb: “Avroliqaya gedib getməyəcəyimizlə maraqlanmırıq”.