“Oyunu biz udmalıydıq, “Zirə” yox”

“Bu, “İnter”in heyətində ilk rəsmi oyunum idi. “Zirə”yə qarşı çıxışımın normal alındığını düşünürəm”. Futbolxeber.az saytına müsahibəsində bu sözləri “İnter”in yeni transferlərindən olan Vüqar Nadirov deyib.

Təcrübəli forvard dünən Premyer Liqanın XIX turunda “Zirə”yə 1:2 hesabı ilə uduzduqları oyunu belə şərh edib: “Oyun demək olar ki, tək qapıya gedirdi. 90 dəqiqə ərzində “Zirə” cəmi 2 hücum qurdu və hər iki halda da qapımıza qol vurdu. Oyunu biz udmalıydıq, “Zirə” yox. Futbolda istənilən nəticə qeydə alına bilər. Bunu faciəyə çevirmək lazım deyil. Hesab edirəm ki, qış fasiləsindən sonra ilk oyun üçün “İnter” kifayət qədər məzmunlu futbol sərgilədi”.

Nadirov turnir cədvəlindəki vəziyyəti də dəyərləndirib: “3 xal qazanmaq istəyirdik. Belədə, nəinki “Zirə”ylə xal fərqini artırmış olardıq, həm də “Qarabağ”a da yaxınlaşardıq. Ancaq nə edə bilərik? Qismətimiz beləymiş. Hər oyunda maksimum nəticə əldə etmək üçün əlimizdən gələnin ən yaxşısını etməliyik.

Vüqar Nadirov Antalyada hazırlıq keçməyin üstünlüklərini belə ifadə edib: “Hava şəraiti normal qrafiklə məşq etməyə imkan verir. Ümumi şərait də, sparrinq-partnyorların seçimi də Türkiyədə daha münasibdi. Əminəm ki, Antalya toplanışının bəhrəsini görəcəyik. Əsas səbrdi, düşünəm ki, uğurlu nəticələr uzaqda deyil”.