Qazaxıstan klubu “Zirə”ni darmadağın etdi

Antalyada təlim-məşq toplanışında olan “Zirə” bu gün hazırlıq prosesi çərçivəsində ilk yoxlama oyununu keçirib. Futbolxeber.az-ın məlumatına görə, Adil Şükürovun komandası Qazaxıstanın “Ordabaşı” klubunu sınağa çəkib. Matç təmsilçimizin darmadağını ilə yekunlaşıb. Belə ki, “Ordabaşı” “Zirə”ni 4:1 hesabı ilə üstələyib.

Matçda hesab 40-cı dəqiqədə açılıb. Radivoeviç “Zirə”ni məyus edib. 5 dəqiqə sonra Nurqəliyev hesab arasında fərqi artırıb. 55-ci dəqiqədə Novruzov “Zirə”ni ümidləndirsə də, 2 dəqiqəyə 2 qol vuran qazaxlar darmadağını rəsmiləşdiriblər. Əvvəlcə 65-ci dəqiqədə Kaykibasov üçüncü qolu “Zirə”nin qapısından keçirib. 66-cı dəqiqədə isə Yunuzoviç yekun nəticəni müəyyənləşdirib.