Mustafa Dənizli: “İstefa verməmişəm”

“Xəzər Lənkəran”ın artıq sabiq hesab olunan baş məşqçisi Mustafa Dənizli maraqlı açıqlama verib. Futbolxeber.az-ın məlumatına görə, türkiyəli mütəxəssis "Anadolu" agentliyinə açıqlamasında istefa vermədiyini qeyd edib. O, klub rəhbərliyi ilə gələcək layihələrlə bağlı aralarında fikir ayrılığının olduğunu təsdiqləyib. Amma qeyd edib ki, istefa ilə nəticələnəcək bir hadisə yaşanmayıb. M.Dənizli bildirib ki, hazırda Türkiyədədir və gələn həftə klubun rəhbərliyi  görüşərək təkrar müzakirə aparacaq: "Klubun prezidenti ilə bəzi məsələlərdə fikir ayrılımızın olması isə təbiidir".

Xatırladaq ki, “Xəzər Lənkəran”ın rəsmi saytı bu gün M.Dənizli ilə yolları ayırdığını açıqlayıb. Bildirilib ki, bu gün "Xəzər Lənkəran" Futbol Klubunun prezidenti Mais Mənsimov və  M.Dənizli arasında görüş keçirilib. Görüşdə komandanın durumu barədə müzakirələr aparılıb və yekunda türkiyəli mütəxəssislə yolların ayrılması qarşılıqlı şəkildə razılaşma əldə olunub.