Riçard Almeyda: “Azərbaycanlılar futbolun elə də böyük fanatları deyillər”

“Qarabağ”ın və Azərbaycan millisinin sabiq futbolçusu Riçard Almeyda Braziliya mətbuatına müsahibə verib.

Futbolxeber.az saytının məlumatına görə, yutub kanalında yayımlanan "Exclusiva TSP" rubrikasında sualları cavablandıran 36 yaşlı yarımmüdafiəçi əvvəlcə hazırkı klubu “Primavera”dakı (Braziliya) işlərindən danışıb:

“Əvvəlcə heç asan deyildi. Xaricdəki vaxta, oradakı oyun sisteminə uzun illərdən sonra uyğunlaşmışdım. Buraya qayıdanda mənim üçün asan olmayacağını ilk gündən bilirdim. Burada heyət çox keyfiyyətlidir. Mənim oynadığım mövqedə də güclü futbolçular var idi. Amma baş məşqçimiz - professor Fernando, oyunçular və bütün məşqçi heyəti mənimlə çalışaraq uyğunlaşmağım üçün dəstək oldular. Bəli, mən mövsümün ortasında gəldim. Onda komandanın ritmi başqa idi".

O, Braziliya və Azərbaycandakı azarkeş mədəniyyəti arasında fərqləri belə təsvir edib: "Azərbaycanda çox azarkeş olmur, onlar futbolun elə də böyük fanatları deyillər. Ancaq Avropa Liqasında və ya Çempionlar Liqasında oynayanda stadion dolurdu. Yerli liqada isə yalnız derbi oyunlarında stadionda azarkeş çox olur. Amma burada, Braziliyada küçədə azarkeşi görürsən. Son oyunlarda “Santo André”də stadiona daxil olarkən azarkeşlərin dəstəyi inanılmaz idi. Braziliyadan tez ayrıldığım üçün bu hissi burada əvvəl yaşamamışdım. Hətta telefonumda videolar saxlamışam. Bu, braziliyalıların futbola necə aşiq olduqlarını göstərir".

Almeyda “Qarabağ”da çıxış edərkən Çempionlar Liqasının qrup mərhələsində meydana çıxdığı görüşləri də xatırlayıb. O, bu oyunların unudulmaz olduğunu bildirib: "İlk oyunumuz İngiltərədə “Çelsi”yə qarşı idi. Gənc olanda televizorda izlədiyim bu komandalarla real həyatda oynamaq çox xüsusi hissdir. Sonra “Atletiko” Madrid ilə “Vanda Metropolitano” stadionunda oynadıq. Sonra “Roma”nın Olimpiya stadionunda meydana çıxdıq. Bu, bir futbolçu üçün unudulmaz hisslərdir".

2017-2023-cü illərdə Azərbaycan milli komandasında çıxış edən Almeyda bundan qürur duyduğunu deyib: "Sən Çempionlar Liqası, Avropa Liqası və Konfrans Liqasında necə çıxış edirsənsə, dünya çempionatı və Avropa çempionatının seçmə mərhələləri də o qədər vacibdir. Mən Almaniya, Xorvatiya, Sloveniya, Slovakiya kimi milli komandalara qarşı oynadım. Bu, mənim üçün böyük şərəf idi. Bu onu göstərir ki, ölkədəki fəaliyyətim dəyərləndirildi. Çünki hər kəsə vətəndaşlıq verilmir”.