Van Qal: “Bu qədər qol vuracağımızı gözləmirdik”

“İspaniya elə bizim düşündüyümüz kimi hücum etdi. Bilirdik ki, bu halda fərqlənmək üçün şans yaxalayacağıq. Amma bu qədər qol vuracağımızı gözləmirdik”. Futbolxeber.az-ın məlumatına görə, bu sözləri İspaniya ilə oyun haqda danışarkən Hollandiya millisinin baş məşqçisi Lui van Qal deyib.

Təcrübəli mütəxəssis komandasının qapısına təyin olunan penalti qərarının düzgün olmadığını düşünür: “Komandamız müdafiədə kompakt şəkildə oynadı və bununla da rəqibin işini çətinləşdirdik. Yeri gəlmişkən, qapımıza təyin olunan penaltinin düzgün olduğuna şübhə edirəm. Əsasən əks-hücumlara ümid edirdik. Heyətinizdə Robben, Sneyder, van Persi kimi futbolçular varsa, mütləq komandanız fərqlənəcək”.

Növbəti oyunla bağlı sualı van Qal belə cavablandırıb: “Avstraliya ilə oyun tam fərqli olacaq. Çünki ispanlar daim hücum edir, meydanda dominantlıq etmək istəyirlər. Asvtraliya isə bizə qarşı müdafiədə oynayacaq”.