Terri: “Finala yüksəlmək belə, bizim üçün uğur sayılacaq”

“Heç vaxt komandamı risqə atmaram. Odur ki, hər zaman məşqçiylə səmimi oluram. 2 gün əvvəl Maurinyo məndən özümü necə hiss etdiyimi soruşdu, mən də vəziyyətimin yaxşı olduğunu bildirdim. “Atletiko”yla oyuna tam hazıram”. Futbolxeber.az-ın məlumatına görə, bu sözləri “Çelsi”nin müdafiəçisi Con Terri deyib.

Təcrübəli futbolçu London klubunun çalışdırıcısı Joze Maurinyo haqda da danışıb: “O, səhər məşqdə hamıdan birinci gəlir və meydançanı hamıdan sonda tərk edir. Biz hamımız bunu görürük. Jozenin nəyə görə bu qədər uğur qazandığını bilirəm. Çünki o, hər gün futbolçulardan maksimum çalışmağı tələb edir. Maurinyonu hər birimiz çox sevirik. Onunla çalışmaq bizə zövq verir”.

Terri “Atletiko”ya qarşı baş tutacaq oyun barədə isə bunları söyləyib: “Finalın bir addımlığındayıq. Həlledici qarşılaşmaya yüksəlmək belə, bizim üçün uğur sayılacaq. İndi fikrimizi “Atletiko”yla oyuna yönəltmişik”.