Ançelotti Beyli ehtiyatda saxlamaq istəsə də, Peres buna imkan vermədi

Bu gün Çempionlar Liqasının 1/2 final mərhələsinin cavab görüşü çərçivəsində baş tutacaq “Bavariya” - “Real” matçından öncə İspaniya mətbuatı olduqca maraqlı xəbər yayıb. Futbolxeber.az-ın məlumatına görə, “El Pais” iddia edir ki, “Kral klubu”nun baş məşqçisi Karlo Ançelotti Qaret Beyli ehtiyat oyunçular skamyasında saxlamaq istəsə də, klub prezidenti Florentino Peres buna imkan verməyib.

İtaliyalı mütəxəssis meydana 4-4-2 taktiki sxemi ilə çıxmağı, orta xətdə Di Mariya, Kazemiro, Modriç, Alonso, hücumda isə Ronaldo və Benzema tandeminə şans verməyi planlaşdırıb. Bundan xəbər tutan Peres isə Ançelottiyə ultimatum verib - Beyl mütləq start heyətində ter almalıdır!

Xatırladaq ki, bu komandalar arasında Madriddə baş tutan ilk matçda ehtiyatda qalan Beyl, 73-cü dəqiqədə Kriştianu Ronaldonun əvəzinə meydana daxil olmuşdu.