“Fənərbaxça”lı azarkeşlər “Qalatasaray”ın mağazasını yandırdı, 15 fanat həbs olundu

Kadıköydə komandalarının çempionluğunu bayram edən bir qrup “Fənərbaxça” azarkeşi əzəli rəqib “Qalatasaray”ın da bostanına daş atmağı unutmayıb. Futbolxeber.az-ın Türkiyə mətbuatına istinadən verdiyi məlumata görə, “Bağdat Caddesi”ndə toplanan “sarı-lacivərtli” tərəfdarlar həmin küçədə yerləşən “GS Store” mağazasına hücum ediblər. Mağazanı əvvəlcə daşlayan “Fənər”lilər, daha sonra içəri girməyə cəhd ediblər. İstəklərinə çatdıqdan sonra mağzanın pəncərələrini sındıran azarkeşlər “Qalatasaray”a aid olan forma və digər əşyaları bayıra ataraq yandırıblar. 

Olaydan hiddətlənən “Qalatasaray”ın azarkeşlərinin bir qismi “Fənər”lilərlə mübahisə də edib. Hadisədən xəbər tutan polis əməkdaşları mağazaya hücum edən fanatlardan 15-ini yaxalayıb. Polis bölməsində ifadə verən 15 “Fənərbaxça”lının bu gün məhkəməyə çıxarılacağı qeyd olunur.