Yağışdan çıxıb yağmura düşən Şevel: “Hədəfim “Neftçi” ilə birlikdə böyük uğurlar qazanmaqdır”

“Neftçi”nin yeni transferlərindən olan Viçko Şevelin Futbolxeber.az saytına müsahibəsi

- “Şəfa” ilə oyunda “Neftçi”nin heyətində debüt etdiniz. Təəssüratlarınız necədir?

- Hər şey mükəmməldir. Yeni komandamın heyətində debüt etdim və buna görə çox şadam. Yaxşı komandamız var. Mən də bu klubun bir parçası olmaqdan məmnunam.

- Komandanızın 4:1-lik qələbəsini necə şərh edərdiniz?

- Biz rəqibdən daha yaxşı idik. Bunu da meydanda göstərdik. Düzdür, ikinci hissənin əvvəlində qapımızda qol gördük. Amma bu qola da yaxşı reaksiya verdik. Layiqli qələbə qazandıq. Hesab arasındakı fərq daha böyük ola bilərdi. Şadam ki, debüt matçımda qalib gəldik.

- “Neftçi” azarkeşləri necə təsir bağışladılar?

- Azarkeşlər əla idilər. Sona qədər bizi dəstəklədilər. İnanıram ki, növbəti matçlarda fanatlarımızın sayı daha çox olacaq. Futbolçuların səviyyəsi yüksəkdir. Burada olduğum üçün xoşbəxtəm.

- “Neftçi”nin əsas heyət üzvünə çevrilməyiniz üçün nə qədər zamana ehtiyac duyursunuz?

- Baş məşqçi ilə söhbətimiz olub. Şotland futbolu bir qədər fərqlidir. Çalışıram, əlimdən gələni edirəm ki, sürətli şəkildə kollektivə uyğunlaşım. Komanda yoldaşlarım da mənə dəstək olurlar. Baş məşqçi nə vaxt məsləhət bilsə, start heyətində yer alacağam.

- Ümumiyyətlə, hədəfləriniz nədir?

- Hədəfim “Neftçi” ilə birlikdə böyük uğurlar qazanmaqdır. Dediyim kimi, çox yaxşı komandamız var. Düşünürəm ki, bu kollektiv ən yüksək hədəflər uğrunda mübarizə apara bilər.

- Bura gəlməmişdən öncə Azərbaycan futbolu, “Neftçi” haqda hansı məlumatlarınız var idi? Kiminləsə məsləhətləşdiniz?

- Daha əvvəl Azərbaycanda oynamış bəzi xorvat futbolçularla söhbətim oldu. Eləcə də “Neftçi”dən Saviçi tanıyıram. Onun da fikirlərini soruşdum. Danışdığım hər kəsdən komanda haqda yalnız müsbət fikirlər eşitdim. Bu da qərarımı qətiləşdirməyə kömək oldu.

- Futbol tərəfini kənara qoysaq, Bakı şəhər olaraq necə təsir bağışladı?

- Bakı gözəldir. Amma açığı, hələ şəhəri gəzmək imkanım olmayıb. Çünki gələndən ancaq məşq edirəm (gülür). İmkan olan kimi şəhəri gəzəcəyəm. Hələ ki əsasən şəkillərdən görmüşəm. Ən əsası isə buranın hava şəraiti Şotlandiyadan fərqlənir.

- Yağışlar az olur?

- Elədir. Amma mən gələn ilk günü leysan idi (gülür).