Ceyhun Nuriyev: “Ən azı heç-heçəyə layiq oyun göstərdik”

“Ən azı heç-heçəyə layiq oyun göstərdik. Matça yaxşı başlamışdıq. Erkən qol bizi bir qədər sarsıtdı. Bir xalı haqq edirdik. Komanda get-getə daha yaxşı formaya düşür. Mübarizə əzmimiz daha da artıb. Nəticə qazanmağa hazırıq. “Qarabağ”la matçda qol epizodlarından vaxtında yararlansaydıq, ən azı 1 xal qazana bilərdik”.

Futbolxeber.az saytının məlumatına görə, bu sözləri “Araz-Naxçıvan”ın yarımmüdafiəçisi Ceyhun Nuriyev Azərbaycan Premyer Liqasının IV turunda “Qarabağ”a 2:3 hesabı ilə uduzduqları oyun barədə danışarkən deyib.

Yarımmüdafiəçi hər iki qolu standart vəziyyətdən vurmalarına belə münasibət bildirib: “Qarabağ”ın standart vəziyyətlərini analiz etmişdik. Bəli, boşluqları var idi. Bu boşluqları bilirdik. Demək olar ki, o boşluqlardan da qollar vurduq”.

“Araz-Naxçıvan”ın cari mövsümdəki hədəfi nədir?” sualını Nuriyev belə cavablandırıb: “Hazırda hədəflər barədə danışmaq tezdir. Çünki geridə qalan turlar ərzində qələbə qazana bilməmişik. İlk növbədə qalib gəlməliyik. Üçüncü dövrədə hədəflər barədə danışmaq olar. Hazırda hədəf qalib gəlməkdir”.