Rüfət Abbasov: “Bu qolu heç vaxt unutmayacağam”

“Neftçi”nin müdafiəçisi Rüfət Abbasovun Futbolxeber.az saytına müsahibəsi

- Azərbaycan Premyer Liqasının IV turunda “Şəfa”ni 4:1 hesabı ilə məğlub etdiniz. Qələbəni necə şərh edərdiniz?

- Evdə oynayırdıq. Ötən tur məğlub olmuşduq. Bu səbəbdən də mütləq qələbə qazanmaq istəyirdik. Şükür ki, istəyimizə çatdıq. İndi də bunun ardını gətirməliyik.

- Matçın gedişində zədələndiniz. İndi vəziyyətiniz necədir?

- Qaşım partlayıb. Rəqibin dirsəyi dəydi. Hər şey qaydasındadır.

- İkinci hissəyə “Şəfa” qolla başladı. Bu, “Neftçi”nin arxayınlaşmasından irəl gəlirdi?

- Arxayınlaşma yox idi. Rəqib beşli müdafiə ilə oynayırdı. Buna görə bir qədər rəqibin arxa xəttini yarmağa çətinlik çəkirdik. İlk hissəni öndə tamamladıq. Fasilədən dərhal sonra rəqib hesabı bərabərləşdirdi. Buna baxmayaraq, hücumlarımızı davam etdirdik və qolları vurduq. Əslində hesab arasındakı fərq daha böyük ola bilərdi. Bununla belə, əsas olan qələbə idi.

- Sizi “Şəfa” ilə matçın ən yaxşısı hesab etmək olar?

- Əsas odur komanda qələbə qazansın. Siz ən yaxşı deyirsizsə, deməli, elədir (gülür).

- Bəs sizcə, oyunun ən yaxşısı kim idi?

- Məncə də, elə mən idim.

- Baxımlı qola imza atdınız. Maraqlıdır ki, solayaq olsanız da, sağla zərbə endirdiniz...

- Məşqlər bunun üzərində çalışıram. Sağ ağayımla zərbələri yoxlayırdım. Lakin məşqlərdə bu qədər uğurlu alınmırdı. Oyunda isə zərbə mükəmməl alındı.

- Bu, “Neftçi”nin əsas heyətində ilk qolunuz idi, düzdür?

- Elədir. Mən “Neftçi”də böyümüşəm. Bu qolu heç vaxt unutmayacağam.

- Sizcə, qolunuz ayın ən yaxşıları sırasına, TOP-ə düşəcək?

- Məncə, düşə bilər.

- Qarşıda “İmişli” ilə oyun gəlir. Həmin matçdan gözləntiləriniz nədir?

- Səfərdə, süni meydanda oynayacağıq. Çətin olacaq. Bununla belə, məqsədimiz qələbə qazanmaq və azarkeşləri sevindirməkdir.

- Azarkeşlərdən söz düşmüşkən, "Şəfa” ilə matçda onların sayı elə də çox deyildi. Sizcə, bu, “Zirə”yə məğlubiyyətdən irəli gəlirdi?

- Açığı, dəqiq səbəb deyə bilmərəm. Sizin vasitənizlə azarkeşlərə səslənirəm: bizə dəstək olsunlar. Bu, bizə motivasiya, əlavə güc verir.