Ramiz Çovdarov: “Bizə güc verən bu dəstək idi”

“Çox xoşbəxtik. Allaha şükür ki, ikinci dəfə Avropa çempionu olduq. Orada olan, orada olmayıb ürəyi bizimlə olan azakeşlərimizin hər birinə təşəkkür edirəm. Bizə güc verən bu dəstək idi”.

Futbolxeber.az saytının məlumatına görə, bu sözləri minifutbol millimizin üzvü Ramiz Çovdarov Azərbaycan yığmasının tarixində ikinci dəfə Avropa çempionu olmasını şərh edərkən deyib.

O, Serbiyaya qarşı keçirilən yarımfinal matçında penaltilər seriyası zamanı həlledici zərbəni vurduğu andan da söz açıb: “Belə anları çox yaşamışam. Təcrübəmə güvənərək topu götürdüm. İstəmədim cavan oyunçularımız gərginlik keçirsinlər. Məsuliyyəti üzərimə götürdüm. Çox şükür ki, zərbəni dəqiq yerinə yetirdim və finala yüksəldik”.

Yığma üzvü rəqiblərin aqressiv oyunu barədə bunları söyləyib: “Rəqiblər bizə qarşı aqressiv oynayırdılar. Bu da gözlənilən idi. Çünki biz yarışa son dünya çempionu kimi qatılmışdıq. Bütün rəqiblər bizə qarşı çox ciddi hazırlaşmışdılar. Azərbaycan yığmasını məğlub etmək istəyirdilər. Lakin buna imkan vermədik. Yenidən Avropa çempionu olduq. Bizə dəstək olan hər kəsə minnətdaram”.