“Cəbrayıl”ın tapıntısı: “Daha da yaxşı olmaq üçün dayanmadan çalışıram”

I Liqada turnir cədvəlinin aşağı pilləsində qərarlaşmasına baxmayaraq, “Cəbrayıl” son turlar inamlı təsir bağışlayır. Əvvəlcə “Zaqatala”nı 3:2 hesabı ilə məğlub edən komanda, son turda da çətin “Şahdağ-Qusar” səfərindən xalla qayıtmağı bacardı (0:0). Komandanın uğurlu çıxışında pay sahibi olanlardan biri də Həsən Hüseyndir. Qış fasiləsindan sonra “Cəbrayıl”a qoşulan 21 yaşlı yarımmüdafiəçi artıq komandanın əsas heyət üzvlərindən birinə çevrilib. Buna qədər Polşa aşağı liqasında forma geyən “88 nömrə”ni “Cəbrayıl”ın tapıntısı da hesab etmək mümkündür. Futbolxeber.az saytına müsahibəsində Həsən Hüseyn komandanın son turlardakı uğurlu çıxışından, eləcə də Polşa ilə Azərbaycan futbolu arasındakı fərqdən danışıb.  

- Son turda səfərdə "Şahdağ-Qusar"la heç-heçə oynadız. Qələbə qazanmaq üçün nə çatışmadı?

- Oyuna yaxşı başladıq, meydanda açıq və maraqlı mübarizə getdi. Hər iki tərəfin fərqlənmək üçün şansları oldu. Qələbə qazana bilməməyimizin əsas səbəbi son zərbələrdə dəqiqliyin çatmaması oldu. Oyuna nəzarət etdiyimiz hissələr çox idi, amma yaradılan epizodları qola çevirə bilmədik. Bir az da son ötürmələrdə tələskənlik hiss olunurdu. Elə mən özüm də fərqlənə bilərdim. Bir epizodda topu rəqib oyunçudan oğurlayıb qapıya zərbə endirsəm də, azca dəqiqlik çatmadı.

- Ötən tur "Zaqatala"nı məğlub etməklə 3 xal həsrətinə son qoydunuz. Bu qələbə futbolçularda özünəinam hissəni qaytarıb?

- “Zaqatala” üzərində qələbə komanda üçün çox vacib idi. Əvvəlki oyunlarda qələbə qazana bilməmək psixoloji baxımdan komandaya təsir edirdi. Bu oyundan sonra futbolçuların özünəinamı artıb, məşqlərdə və oyunlarda daha rahat və inamlı çıxış etdiyimizi görmək olur. Təbii ki, baş məşqçimiz Cavid Hüseynovun intensiv məşqləri də öz bəhrəsini verir. Düzdür, komandanın toparlanması bir az zaman aldı, lakin bu da başadüşüləndir, çünki çünki kollektiv böyük hissəsi yeni yığılıb.

- Gələn tur güclü "Mingəçevir"lə qarşılaşacaqsınız. Həmin matçda məğlubiyyətsiz oyunlar seriyasını davam etdirmək mümkün olacaq?

- “Mingəçevir” güclü və intizamlı komandadır, bunu hamımız bilirik. Amma biz də son oyunlarda yaxşı formadayıq. Əgər eyni tempdə və düzgün yanaşma ilə oynasaq və itkilərimiz olmasa, məğlubiyyətsiz oyunlar seriyasını davam etdirmək mümkündür. Əsas məsələ konsentrasiyanı itirməməkdir. Mən  də çalışacağam ki, orta sahədə öz oyunumla komandama dəstək olum.

- Öz çıxışını necə dəyərləndirirsən? Son 2 oyunda inamlı təsir bağışlayırsan...

- Düşünürəm ki, son oyunlarda kifayət qədər yaxşı və stabil performans sərgiləyirəm. Meydanda daha inamlıyam, oyunu daha yaxşı oxuyuram və komandaya həm müdafiədə, həm hücumda fayda verməyə çalışıram. Son iki oyunda da bunun nəticəsi hiss olunur – həm fiziki, həm də taktiki baxımdan özümü yaxşı tərəfdən göstərməyə çalışıram. Amma yenə də dayanmaq fikrim yoxdur, daha da yaxşı olmaq üçün işləməyə davam edirəm.

- Texnikalı oyuna üstünlük verməyin nədən irəli gəlir?

- Açığı, uşaqlıqdan mən texnikanın üzərində işləmişəm. Özünü tərifləmək kimi çıxmasın, amma həmişə məşqlərə xüsusi fikir vermişəm. Çalışmışam ki, hər iki ayağım eyni şəkildə işləsin. Bunun üçün xüsusi məşqlərə çox vaxt ayırmışam. Hər oyunda uğurlu olmağa, ötürmələrdə səhvə yol verməməyə, komandam üçün faydalı olmağa çalışıram.

- Artıq bir müddətdir I Liqada çıxış edirsən. Buna qədər isə Polşada forma geyirdin. Polşa ilə buradakı şərait arasında fərq nə dərəcədə çoxdur?

- Polşa ilə I Liqa arasında fərq kifayət qədər hiss olunur. Orada infrastruktur, oyun tempi və ümumi peşəkarlıq səviyyəsi bir az daha yüksəkdir. Amma burada da inkişaf var, liqa rəqabətlidir və futbolçular özlərini göstərmək üçün yaxşı imkan əldə edirlər. Adaptasiya dövründən sonra buradakı futbola da uyğunlaşmaq olur.