Bu gün 6 klubumuz mövsümün ikinci hissəsinin hazırlıqlarına başlayır

Bu gün Premyer Liqamızın 6 klubu üçün qış fasiləsi başa çatır.

Futbolxeber.az saytının məlumatına görə, “Qarabağ”, “Zirə”, “Sumqayıt”, “Karvan-Yevlax”, “Kəpəz” və “Qəbələ” bu gündən məşqləri bərpa edir.

“Qarabağ” öz bazasında bir araya gələcək. Ağdam klubu 1 həftə Bakıda hazırlıq keçdikdən sonra Antalyaya yollanacaq. Qurban Qurbanovun komandası Türkiyədə 2 yoxlama matçı keçirəcək.

Eyni qrafik “Zirə”yə də aiddir. Qəsəbə təmsilçisi də bu gündən ayın 10-na kimi Bakıda, növbəti bir həftəni isə Antalyada hazırlıq keçəcək və 2 yoxlama görüşündə qüvvəsini sınayacaq.

“Karvan-Yexlav” hazırlıqlara Yevlaxda başlayır. Füzuli Məmmədovun komandası toplanış müddətində 2 yoxlama matçı keçirəcək. Hələlik rəqiblərdən biri (“Kəpəz”) məlumdur.

 “Kəpəz” məşqlərə Gəncədə start verəcək. Azər Bağırovun komandası toplanış müddətində iki yoxlama oyununa çıxacaq. “Kəpəz” yanvarın 10-da Qəbələdə “Qəbələ” ilə, ayın 17-də isə Yevlaxda “Karvan-Yevlax”la qarşılaşacaq.

“Qəbələ” də bu gün doğma məkanda bir araya gələcək. Hazırlıq prossesinin birinci mərhələsi yanvarın 13-dək Qəbələdə olacaq.   “Qırmızı-qaralar” hazırlıq mərhələsinin ikinci hissəsini 14-18 yanvar tarixlərində Bakıda keçirəcək. Komandanın toplanış çərçivəsində 3 yoxlama oyunu keçirməsi nəzərdə tutulur.

Digər 5 klubdan fərqli olaraq “Sumqayıt” təlim-məşq toplanışına birbaşa Antalyada start verəcək. Saşa İliçin komandası yanvarın 17-dək Lara bölgəsində yerləşən “Limak” otelində məskunlaşacaq. “Sumqayıt” 2 həftəlik toplanış ərzində 3 yoxlama oyununda qüvvəsini sınayacaq. Komanda 9, 12 və 16 yanvar tarixlərində müvafiq olaraq Macarıstanın “Paksi”, Serbiyanın “OFK Belqrad” və Xorvatiyanın “Osiyek” klubu ilə yoxlama oyunları keçirəcək.

Premyer Liqanın digər klublarına gəldikdə, “Neftçi” sabah Bakıda bir araya gələcək və toplanış üçün Abu-Dabiyə yollanacaq. “Turan Tovuz” sabah Antalyada toplaşacaq. “Şamaxı” isə yanvarın 5-də məşqlərə start verəcək.

Digər klublarla bağlı hələlik açıqlama verilməyib.

Futbolxeber.az