“Qarabağ”la oyun göstərdi ki, Füzuli Məmmədovun gəlişindən sonra müsbətə doğru dəyişiklik var”

“Karvan-Yevlax”ın müdafiəçisi Elvin Yunuszadə Azərbaycan Premyer Liqasının 13-cü turunda “Qarabağ”a 0:2 hesabı ilə uduzduqları oyundan sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Uzun müddət qapınızı toxunulmaz saxlasanız da, yekunda “Qarabağ”a uduzdunuz. Görüşlə bağlı nə deyə bilərsiniz?

- Əvvəldən bilirdik ki, “Qarabağ”a qarşı oynamaq çətindir. Ümumilikdə çıxışımız pis alınmadı. Sadəcə sona qədər dözə bilmədik. Təəssüflər olsun ki, matçın sonuna yaxın qapımızda iki qol gördük və uduzduq. Artıq növbəti matçlara baxmalı, səhvlərimiz üzərində işləməliyik.

- Demək olar ki, matçın taleyini “Qarabağ”ın sonradan meydana çıxan futbolçuları həll etdi?

- Bəli, sonradan meydana daxil olanlar matçın nəticəsinə təsir etdilər. Bizdə yorğunçuluq var idi, rəqib isə yeni futbolçularla oyunu gücləndirdi. Həmin legionerlərin ustalıq səviyyəsi hər kəsə məlumdur.

- Qarşıdan kubok, sonra yenə çempionat oyunu gəlir. “Karvan-Yevlax” bu sıx qrafikə nə dərəcədə hazırdır?

- Kubokda da “Qarabağ”la üz-üzə gələcəyik. Əlbəttə, bu komandaya qarşı oynamaq çətindir. Lakin nə etmək olar, işimizdir. Bu cür hallara, belə çətin oyunlara hazır olmalıyıq. İnkişaf etməyimiz üçün bu cür gərgin matçlar lazımdır.

- Baş məşqçi dəyişikliyi “Karvan-Yevlax”a necə təsir edib?

- Yeni baş məşqçi gələndə futbolçularda da motivasiya, istək artır. Oyun sistemimizdə də dəyişiklik var. “Qarabağ”la oyun göstərdi ki, Füzuli Məmmədovun gəlişindən sonra müsbətə doğru dəyişiklik var. O, komandanı hələ 3-4 gündür çalışdırır. Bir qədər zamana ehtiyac var.

- Qeyd etdiyiniz kimi, Füzuli Məmmədovun gəlişindən sonra komandada müsbətə doğru dəyişiklik nəzərə çarpır. Bir az konkretləşdirsək, Məmmədovun gəlişi nəyi dəyişib?

- Füzuli müəllim bu dəqiqə bizdən çox həvəslidir. Onun işinə olan həvəsi bizə də keçir. Sistem, taktika üzərində işləyirik. Lakin zaman lazımdır ki, baş məşqçi istədiklərini tam diktə edə bilsin. Zamanla daha yaxşı “Karvan-Yevlax” görəcəksiniz.

- Qış fasiləsinə qədər çempionatda 3 tur qalıb. “Karvan-Yevlax” yeni ilə qədər son pillədən qurtula bilər?

- Məşqlərdə çox çalışırıq. Bu templə davam etsək, vəziyyətimiz tezliklə düzələcək. Yenə deyirəm, ən qısa zamanda fərqli “Karvan-Yevlax” görəcəksiniz.