Abubakar gəldi, siz də gəlin – Stadion aeroportdan yaxındır

Bakı aeroportu sonuncu dəfə futbol azarkeşlərinin bu cür izdihamını yəqin ki, “Qarabağ” ilk dəfə Çempionlar Liqasının qrupuna düşəndə, Kopenahengən səfərindən qayıdanda görmüşdü... Gecə saat 12 radələri olsa da, 200-300 arası “Neftçi” azarkeşi komandanın yeni transferi Vinsent Abubakarı qarşılamaq üçün hava limanına təşrif buyurmuşdu.

Məncə, bu marağın, bu ajiotajın iki səbəbi var. Birincisi, təbii ki, Abubakarın böyük futbolçu olmasıdır. 3-5 futbolun f-sından xəbəri olmayanın ağız büzüb “pensioner” dediyi Abubakar karyerası ərzində böyük klublarda oynayıb, Kamerun millisinin tarixində ikinci bombardirdir. Bu səviyyədə futbolçu Azərbaycana hər həftə, hər ay gəlmir. Abubakarın flaqmana keçidi həm də klub rəhbərliyinin uğurudur. Özü də Türkiyə mətbuatının yazdığı kimi, bu keçid “Neftçi”yə havayı başa gəlib. Yəni kamerunlu forvard üçün transfer haqqı ödənilməyib. İllik maaşı isə bəzilərinin iddia etdiyi kimi, fantastik rəqəm deyil. Həm də Abubakar kimi futbolçu gəlib ayı 10-15 minə oynamayacaq ki...

“Neftçi” azarkeşlərinin hava limanına axın etməsinin digər səbəbi isə uğura olan aclıqdır. Komanda 5 ildir çempionluq üzünə həsrətdir, avrokubokların qrup mərhələsindəki çıxışdan 10 ildən artıq vaxt keçib. İndi Abubakarın gəlişi fanatların qəlbində ümid qığılcımı yaradıb. Necə ki, 5 il əvvəl Keysuke Hondanın gəlişi yekunda çempionluq həsrətinə son qoyulmaqla başa çatmışdı.

Abubakar böyük futbolçudur. Amma “Neftçi” ondan da böyükdür. Dünənki izdiham bir daha “ağ-qaralar”ın böyüklüyünün göstəricisidir. Əminəm ki, Abubakar “Neftçi” deyil, başqa bir klub üçün Bakıya gəlsəydi, bu cür möhtəşəm qarşılanmayacaqdı. Bu, bir daha göstərdi ki, yaşıl meydanda yaxşı nəticələr qazanmasa da, “Neftçi” bu ölkədə könüllərin çempionudur. İndi qalır həmin sevgini stadionda göstərmək. Hava limanında azarkeşlərə çiyin-çiyinə atılıb düşən Abubakar, eyni izdimahı stadionda da görməlidir. Kamerunlu vuracağı qolları boş tribunalar önündə qeyd etməməlidir. Bu ölkədə “Neftçi”ni sevən nəinki minlərlə, on minlərlə, yüz minlərlə azarkeş var. İndi o sevgini evdə, televizorun qarşısında yox, stadionda nümayiş etdirmək zamanıdır. Haydı “Neftçi” azarkeşi, gücünü, sevgini dildə deyil, əməldə göstər!

İBRAHİM