Elmar Baxşıyev: “Heyətimdə 11 legioner olsa, mütləq qalib gələcəyəm” yanaşması səhvdir”

“Araz-Naxçıvan”ın baş məşqçisi Elmar Baxşıyevin Futbolxeber.az saytına müsahibəsi

- Bu günlərdə komandanız Naxçıvana yollandı. Səfər necə keçdi, təəssüratlarınız necədir?

- Çox yaxşı səfər alındı. Komandanın bəzi futbolçularının Naxçıvan barəsində təsəvvürləri yox idi. Orada komanda olaraq isti qarşılandıq. Biz də şahidi olduq ki, komandanı Naxçıvanda sevirlər, gözləyirlər. Düşünürəm ki, “Araz-Naxçıvan” doğma yurduna qayıtsa, daha da böyüyə, daha da inkişaf edə bilər.

- Bu, birbaşa sizə aid sual olmasa da, hər halda siz də rəsmi görüşdə iştirak etdiniz, ona görə yəqin ki, bu məsələ haqda məlumatlısınız. “Araz-Naxçıvan” nə vaxt doğma meydanda çıxış edə bilər? Təxmini də olsa, ilin sonuna, mövsümün ikinci yarısına... Nə vaxt?

- Dəqiq vaxt deyə bilməyəcəm. Bizə də vəd olundu ki, komanda Naxçıvana qayıdacaq. Lakin bu mövsümün ortasında, gələn il, növbəti mövsüm – bunu biz də dəqiq bilmirik.

- Premyer Liqada 7 tur geridə qalıb və ikinci pillədəsiniz. Geridə qalan müddəti komandanız üçün necə dəyərləndirirsiniz?

- Qənaətbəxş. Qazanılan xallar komandanın əzmkarlığının, xarakterinin nəticəsidir. Düşünürəm ki, daha da yaxşı olmaq ehtimalımız var. Komanda öz üzərində çalışır. Heç bir rəqibdən çəkinməyərək, öz dəsti-xəttimizdən də əl çəkməyəcəyik.

- İlk 7 turu nəzərə alsaq, demək olar ki, bu il ötənilki nəticəni qazanmaq daha çətin olacaq?

- Oyunlar da göstərir ki, çempionat həqiqətən də ağırdır. Biz də çalışırıq iddiamızı ortaya qoyaq. İddialılar sırasında olaq.

- Ümumiyyətlə, legionet limitinin ləğvindən sonra Premyer Liqada inkişaf var? Yoxsa əksinə, geriləmə hiss olunur?

- Çempionatda əcnəbilərin sayı artıb. Öz komandamızı götürsək, hər matçda 5-6 yerli futbolçuya şans veririk. Bizə təsir etmir. Heyətimizdə yaxşı həm yerli, həm də əcnəbi futbolçular var. “Heyətimdə 11 legioner olsa, mütləq qalib gələcəyəm” yanaşması da səhvdir. 

- Qarşıda 3 çətin oyun gəlir. “Neftçi”, “Sabah”, “Sumqayıt”. Bu matçlardan gözləntiləriniz nədir?

- İndi həmin oyunları yox, daha çox o vaxta qədərki hazırlığı düşünürük.

- “Şəfa” ilə yoxlama matçında komandadan istədiyinizi ala bildiniz?

- Ümumi planımızda yoldaşlıq oyunu var idi. Sağ olsunlar, bizə müsbət cavab verdilər. Bu tip oyunlarda futbolçuların tonusda olması önəmlidir. Hava şəraitini də nəzərə alsaq, istədiyimi futbolçular meydanda mənə qaytarırdılar.

- Zədəlilərin son durumu nə yerdədir? Ramon Maçado, Əyyub Allaş...

- Allaş hazırda reabilitasiya dövründədir. Hələlik dəqiq nə vaxt meydana qayıdacağını söyləmək çətindir. Maçadoda isə müsbət irəliləyiş var. Qarşıdakı həftədə artıq komanda ilə məşqlərə qoşulmalıdır.

Fərəc Aslanov