Mehdi Cənnətov: “Pasportum AFFA-dadır, vaxtı da bitməyib”

“Baş məşqçi milliyə dəvət almamağımı şərh edib. Mənim əlavə edəcəyim başqa nəsə yoxdur”.

Futbolxeber.az saytının məlumatına görə, bu sözləri “Sumqayıt”ın qapıçısı Mehdi Cənnətov Azərbaycan millisinə dəvət almamasını şərh edərkən deyib.

“Şamaxı” ilə oyundan sonra jurnalistlərin suallarını cavablandıran qolkiper qeyd edib ki, bu məsələ barədə əlavə nəsə deməsi çətindir: “Mənə yalnız milliyə uğurlar arzulamaq qalır. İnanıram ki, komanda qarşıdakı görüşlərdə yaxşı çıxış edəcək”.

“Ola bilərmi ki, millinin heyəti əvvəldən müəyyənləşdirilib?” sualını “Sumqayıt”ın qolkiperi belə cavablandırıb: “Bu barədə heç nə deyə bilmərəm. Heyətə bağlı qərarları baş məşqçi verir. O, çempionatın oyunlarına baxır. Kimin milli komandaya faydalı olacağını düşünürsə, onlara da dəvət göndərir”.

M.Cənnətov pasportunda hər hansı problem olması ilə bağlı deyilənlərə belə münasibət bildirib: “Mənim pasportum AFFA-dadır. Qalanını bilmirəm. Pasportumun vaxtı da bitməyib”.

Xatırladaq ki, Mehdi Cənnətovun milliyə dəvət almaması müzakirələrə səbəb olub. Millinin baş məşqçisi Fernandu Santuş bunu qolkiperin pasportunda problem olması ilə əlaqələndirib.

Fərəc Aslanov