Emin Mahmudov: “Vaxt yoxdur, heç kim bizi gözləməyəcək”

“Neftçi”nin kapitanı Emin Mahmudov Azərbaycan Premyer Liqasının ilk turunda “Şamaxı”ya qarşı keçirilən oyundan sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Mövsümə xal itkisi ilə başladınız. Qələbə qazanmaq üçün nə çatışmadı?

- Pis oynamadıq. Qol vurmaq üçün çox şansımız oldu. Onlardan istifadə etmək lazım idi. Xüsusən də “Şamaxı” kimi komandaya qarşı oyunda. Təəssüf ki, qələbə qazana bilmədik.

- Demək olar ki, komandada anlaşma istənilən səviyyədə deyildi?

- Əlbəttə, bəzi oyunçularla anlaşma tam qurmamışıq. Çünki bəziləri təzə gəlib, çalışırıq ki, bu çatışmazlığı aradan qaldıraq. Bir qədər zamana ehtiyac var. Polşada təəssüf ki, hazırlıq oyunlarımızdan biri baş tutmadı. Bu da bizə problem yaratdı. Lakin bunlar bəhanə deyil. Biz ümumiyyətlə, bəhanə gətirə bilmərik. İstənilən halda qələbə qazanmaq lazım idi. Daha yaxşı oynamalıyıq. Sadə epizodlarda top itirirdik. İnşallah, gələcək matçlarda daha yaxşı çıxış edəcəyik.

- Qol vurduqdan sonra xüsusi jest etdiniz. “Hapoel”lə yoxlama matçında da eyni jesti etmişdiniz və maraqla qarşılanmışdı. Bunun xüsusi bir mənası var?

- Bu, dinlə bağlıdır. Bu jesti internetdə görmüşdüm və xoşuma gəlmişdi. Ona görə edirəm.

- İnternetdə hansısa futbolçuda görmüşdünüz?

- Xeyr. Amma bu jesti edən futbolçular da var.

- Müqayisə aparsaq, bu “Neftçi” ötənilki komandadan nə ilə fərqlənir?

- İndi kreativ oyunçularımız daha çoxdur. İmad Farajı hələ oyunda görməmişik. Formaya düşsün, bizə faydası dəyəcək. Varqas da çox kömək edəcək. Eləcə də Rezabala. Onların hamısı komandaya xeyir verəcək gücdədirlər.

- Demək olar ki, “Neftçi”nin öz oyununu tapması üçün 4-5 tura ehtiyac var?

- Vaxt yoxdur. Heç kim bizi gözləməyəcək. Artıq növbəti matçdan qələbə qazanmalıyıq.

- Bu heyət ilk üçlüyə düşməyə kifayət edəcək?

- Əlbəttə. Bu, minimum hədəfdir.

- Konkretləşdirək, “Neftçi”nin yeganə hədəfi çempionluqdur deyə bilərik?

- Bu, dəyişməz hədəfdir. Pis, yaxud yaxşı oynamağın fərqi yoxdur. Məqsəd əvvəlki kimidir.

- Yaxşı, bəs mövsümün sonunda “Neftçi” ikinci yeri tutsa, bunu uğur kimi qəbul edəcəksiniz, yoxsa uğursuzluq kimi?

- Bu, çempionatın gedişindən asılı olacaq.

- Yenidən “Neftçi”nin kapitanısınız. Bu, baş məşqçinin qərarı idi, yoxsa ümumi futbolçuların?

- “Neftçi”nin kapitan sarğısını daşıdığım üçün fəxr edirəm. Bu, baş məşqçinin qərarıdır. Mən komandaya maksimum dərəcədə faydalı olmağa çalışıram. Uşaqlarla əla münasibətim var. Yenilərimiz də çoxdur. Onlara da kömək olmağa çalışıram ki, adaptasiya prosesini tez keçsinlər.

- Növbəti turda “İmişli” ilə Şamaxıda qarşılaşacaqsınız. Süni qazonda oynamaq işinizi nə dərəcədə çətinləşdirəcək?

- İstəməzdim ki, süni qazonda oynayaq. Özü də Şamaxıda. Orada projetkor yoxdur deyə, günün altında oynayacağıq. İstənlən halda qələbə qazanmalıyıq.

İbrahim Cəfərov