Ayxan Abbasov: “Bizim də büdcəmiz çox olsaydı, 16-17 legioner gətirərdik”

“Çempionat dayananda, bir az qədrini bilirik. İlk oyun idi. Rəqib "Neftçi" idi, özü də səfərdə. Onlarda yeni oyunçular var idi. İlk oyunda rəqibləri təhlil etməkdə çətinlik çəkirdik. Bizim də yenilərimiz var idi. Onlara da səfərdə bu arenada "Neftçi"yə qarşı oynamaq çətin idi. Amma ilk oyuna baxmayaraq, futbolçularımdan razı qaldım. Birinci hissə daha çox hücumlarla keçdi, rəqibin üstünlüyünü bilirdik. Bizdə yorğunçuluq oldu. Dəyişiklik etdik. Səfərdə bir xal bizi sevindirir. Bu mövsüm daha yaxşı olmaq, futbolçularımızın daha yaxşı inikişafını istəyirik. Əziyyət çəkməliyik. Azarkeşlərimizə təşəkkür edirəm. Bizi tək qoymamışdılar”.

Futbolxeber.az saytının məlumatına görə, bu sözləri Azərbaycan Premyer Liqasının ilk turunda səfərdə “Neftçi” ilə heç-heçə edən (1:1) “Şamaxı”nın baş məşqçisi Ayxan Abbasov deyib.

Daha sonra o, jurnalistlərin suallarını cavablandırıb:

- Heyətin geniş olmaması işinizi çətinləşdirəcək? Maddi durum legioner gətirməyə imkan vermir?

- Görsəz komandanı necə qurmuşuq... Ehtiyat qüvvə bizdə gənclərdir. Çəkinmədən onlara şans verəcəyik. Onların da şansı gələcək. Əlbəttə ki, onların oyunu ilə digərlərinin oyununda fərq olacaq. Heyətimiz qarşımıza qoyulan hədəfə çatmağa imkan verir. Bizim də büdcəmiz çox olsaydı, 16-17 legioner gətirərdik. Yerliləri də transfer edə bilmirik. Bizim üçün legioner gətirmək yerli gətirməkdən asandır. Biz qarşımıza başqa məqsədlər qoymuşuq. Bu gün hər kəs avrokuboklara, yuxarı yerə oynamağa cəhd etməməlidir. Biz də istəyirik. Amma hədəfimiz başqadır. Emil Süleymanova əsas heyətdə şans versəm, inanıram ki, pis olmayacaq. Oruc və Edqar da bura daxildir. Onları da meydançada görəcəyik.

- Edqarın ehtiyatda qalması nə ilə əlaqədar idi? 90 dəqiqə oynamağa hazır deyil?

- Edqar bizim əsas oyunçumuzdur. Toplanışda son oyunlarda dəyişiklik edirdik. Edqarın cinahında rəqabət var. Bu, onun inkişafına gətirəcək. Edqarın böyük potensialı var. Bizi tam qane etməsi üçün çox çalışmalıdır.

- İlk qol sizə psixoloji üstünlük verdi. Qarşıdakı matçlarda da bunu düşünəcəksiniz?

- Məqsədimiz qol vurmaqdır. Amma birinci hissə, ya ikinci hissə... "Neftçi" kimi komandaya qol vurduqdan sonra bizə təzyiq artacaqdı. Bunu bilirdik. Cinah müdafiəçisini çıxarıb, yarımmüdafiəçiləri cinahlara atdı rəqib. Rezabala ikinci hissə bizə başağrı oldu. 2:0 olsaydı, tam başqa cür olardı. "Neftçi"nin də dirəkdən dönən epizodu oldu. Bizdən üstün rəqiblərə qol vurmaq, psixoloji üstünlükdür. Təzyiqə dözməlidirlər. Futbolçularımı təbrik etdim ki, son 10 dəqiqə "Neftçi"nin təzyiqinə dözdük. Ötən mövsüm son dəqiqələrdə çox qol buraxırdıq. Futbolçularımın soyuqqanlığı çatmırdı ötən mövsüm. Rüfət Abbasov ötən mövsümlə müqayisədə daha soyuqqanlıdır. Hamısı inkişafımıza doğru gedəcək. Əsas odur təslim olmayaq.

- Elçin Məsiyevlə iki dəfə sərt mübahisə yaşadınız. Nə baş vermişdi?

- Elçin Məsiyevi birincisi təbrik etdim. Fəxr etdik, qürurumuzdur. Futbol hakimliyi, inspektoru olsun, UEFA-da bizi təmsil edəndə adımızdır. Ondan xahiş etdim ki, qızıl alan hakimsən, xırda foulları az ver (gülür). Pis idarə etmədi. Xırda foullar var idi ki, bizdə sarı oldu, rəqibdə yox.

- U-21 yığmasının baş məşqçisi kimi hazırkı durumu, yerlilərin azlığını necə şərh edərdiniz?

- Bununla bağlı öz fikrimi çox demişəm. Bu qərar çıxanda oxumusunuz. Yerli futbolçu çox oynamalıdır. Durumla mən də ayaqlaşmalıyam. Əsas heyətdə 2 oyunçu idi. Amma sonradan meydana girənlər gənc və yerlilər idi. Buna qayıtmaq, danışmaq gecdir. Qərarlar verilib. Yeniliklər çoxdur. Özümüz üçün maraqlıdır.

- "Şamaxı"nın baş məşqçisisiniz, amma U-21 yığmasını da çalışdırırsınız. Heyəti quranda nə qədər klubu fikirləşsəniz də, U-21 oyunçularının oynaması üçün, praktikasının olması üçün, onları meydana buraxmaq məcburiyyətindəsiniz. Bu, sizin özünüz üçün ikiqat təzyiq yaradır?

- Yaxşı sualdır. Daxilimdə olan mübarizədir. Amma biz fikirləşəcəyik. Klub olaraq, həm rəhbərlik, həm biz onsuz da ötən mövsüm U-21-in baş məşqçisi olmayanda da, Rüfət Abbasovu, Rauf Rüstəmlini gətirəndə, oranı düşünmürdük. Prinsiplərimiz gəncləri yetişdirməkdir. Komandada rəqabət var. Oyun olacaq ki, bu riskə gedəcəyik. Amma unutmayaq ki, "Şamaxı"nın da yerini qaranti etməliyik. Gələcək imkan verərsə, daha çox şans verəcəyik.