“Sumqayıt”ın “Yay Futbol Düşərgəsi” layihəsinə yekun vurulub

“Paşa Həyat Sığorta” ASC və “İkar-Qrup” MMC-nin (“Kəhriz Su”) sponsorluğu, eyni zamanda, “Azərikimya” İB, "SOCAR Polymer" MMC, Yeni Azərbaycan Partiyası Sumqayıt şəhər təşkilatı, Qərbi Azərbaycan İcmasının dəstəyi ilə “Sumqayıt” Futbol Klubunun təşkil etdiyi “Yay Futbol Düşərgəsi" layihəsinə yekun vurulub.

Futbolxeber.az saytının məlumatına görə, 19 iyun tarixində start götürən və ümumilikdə 9 gün müddətində 3 qrup üzrə keçirilən layihənin sonuncu qrupuna daxil olan uşaqlar "Sumqayıt" Futbol Klubunun bazasında müxtəlif əyləncəli tədbirlərə qatılıb, onlar üçün müxtəlif oyunlar, müsabiqələr, ekskursiyalar təşkil olunub. Layihənin sonuncu günündə isə Yeni Azərbaycan Partiyasının Sumqayıt şəhər təşkilatının inzibati binasında bağlanış tədbiri keçirilib.

Tədbirdə Yeni Azərbaycan Partiyası Sumqayıt şəhər təşkilatının sədri Ramiz Hüseynov, Sumqayıt Gömrük İdarəsinin rəisi və "Sumqayıt" Voleybol Klubunun direktoru Tariyel Alverdiyev, "Paşa Həyat Sığorta" ASC-nin İnsan Resursları şöbəsinin əməkdaşı Coşqun İmanquluyev, "SOCAR Polymer" MMC-nin əməkdaşı Elvin Rzayev, Qərbi Azərbaycan İcmasının əməkdaşı Cəmilə Fəyyaz, "Sumqayıt" Futbol Klubunun vitse-prezidenti Aydın Xəlilov və digər qonaqlar iştirak ediblər.

Tədbir iştirakçıları layihənin önəm və vacibliyi haqqında çıxışlar edib. Daha sonra bütün düşərgə iştirakçılarına "Sumqayıt" Futbol Klubunun, həmçinin sponsorların hazırladığı xüsusi hədiyyələr və diplomlar təqdim edilib.

Ümumilikdə, bu layihədə Sumqayıtda yerləşən məktəb və liseylərin 100-dən artıq oğlan və qız şagirdi iştirak edib.

Qeyd edək ki, 2014-cü ildən "Paşa Həyat Sığorta" ASC-nin sponsorluğu və "Azərikimya" İB-nin dəstəyi ilə keçirilən layihədə bu müddət ərzində 1100-dən çox məktəbli bu seminarın iştirakçısı olub.