Elvin Bədəlov: “Neftçi”yə Samir Abasovun istəyi ilə gəlmişəm”

“Neftçi”yə qayıtmaq arzum idi. Mən buradan gedəndə də demişdim ki, inşallah, daha yaxşı, daha təcrübəli Elvin “Neftçi”yə qayıdacaq. İnanıram ki, indi o vaxt gəlib çatıb. “Neftçi”yə qayıtdığım üçün sevinirəm, böyük klubdur, flaqmandır. Gözəl hisslər keçirirəm. Bundan sonra bizə qalır yalnız işləmək”.

Futbolxeber.az saytının məlumatına görə, bu sözləri yenidən “Neftçi”yə qayıdan Elvin Bədəlov deyib.

Klub televiziyasına müsahibə verən təcrübəli müdafiəçi bu dəfə azarkeşləri yaxşı çıxışı ilə sevindirəcəyinə inandığını bildirib: “Neftçi”yə ilk dəfə gələndə cavan idim. Böyük futbolda, Premyer Liqada ilk addımlarımı demək olar ki, burada atmışam. Təcrübəm həmin vaxt az idi. Çıxışım o qədər də uğurlu alınmamışdı. Demişdim ki, daha yaxşı qayıdacağam. İndi o vaxt gəlib çatıb. Bu dəfə azarkeşlərin də, klubun da daha yaxşı Elvin görəcəklərinə inanıram. Bunun üçün gəlmişəm”.

Bədəlov “Neftçi”yə baş məşqçi Samir Abasovun istəyi ilə transfer olunduğunu vurğulayıb: “Samir müəllimlə yenidən işləmək mənim üçün xoşdur. “Sumqayıt”a da gələndə də onun oyun fəlsəfəsini bəyənirdik. Tək mən yox, klub olaraq. İndi də “Neftçi”yə Samir Abasovun istəyi ilə gəlmişəm. Mən də onun meydanda nə istədiyini bilirəm. Hamı bilir ki, Samir müəllim maraqlı, gözəl futbol oynadır. Yenidən onunla birgə işləyəcəyim üçün sevinirəm. Çalışacağam ki, məşqçiyə daha çox kömək olum”.

30 yaşlı futbolçu qeyd edib ki, “Neftçi” azarkeşləri ən xoş sözlərə layiqdirlər: “Azarkeşləri salamlayıram. Yenidən onlarla birgə olmaq mənim üçün xoşdur. Digər klublarda oynayanda da “Neftçi” azarkeşlərinin daim sevimli komandalarına dəstək olduqlarını görmüşəm. “Neftçi” fanatları ən yaxşı sözlərə layiqdir. Onlara demək istəyirəm ki, həmişəki kimi komandanın yanında olsunlar, dəstəklərini nümayiş etdirsinlər. Biz də sözümüzü meydanda deyəcəyik. Çalışacağıq ki, onları hər zaman sevindirək. Hər məşqdə, hər oyunda maksimum gücümüzlə çalışmalıyıq. Mən də daxil olmaqla hər kəs işinə məsuliyyətlə yanaşsa, yuxarılarda ola bilərik”.

Sonda Elvin Bədəlov “Neftçi”ni bir cümlə ilə necə ifadə edə biləcəyi barədə sualı belə cavablandırıb: “Flaqman”.