Ayxan Abbasov: “İstədiyimiz olmasa, mən də riskə getmərəm”

“Heyət baxımından çox əziyyət çəkirik. Bu oyun yox, mövsüm bizim üçün uğurlu oldu. İstəyimiz Premyer Liqada qalmaq idi. Sevindirici haldır ki, komanda 35 tur ərzində heç vaxt sonuncu yerdə olmadı. Bizdən büdcə baxımından üstün olan komandalarla başabaş mübarizə apardıq. Rəqibi təbrik edirəm. Konfrans Liqasına vəsiqə qazandılar. Gələn mövsüm bizim üçün bundan da ağır keçəcək. Son matçlarda daha çox gənclər, az oynayan futbolçular meydanda olur. Bəlkə də oyunun ədalətli nəticəsi heç-heçə olardı. Bir səhv bizə baha başa gəldi. Çempionatın bitməsini səbirsizliklə gözləyirəm. Son oyundan sonra gələcək haqqında düşünəcəyik”.

Futbolxeber.az saytının məlumatına görə, bu sözləri “Şamaxı”nın baş məşqçisi Ayxan Abbasov Azərbaycan Premyer Liqasının 35-ci turunda “Araz-Naxçıvan”ı 0:1 hesabı ilə uduzduqları oyundan sonra deyib.

Daha sonra o, jurnalistlərin suallarını cavablandırıb:

- Bir çox futbolçularınıza təkliflər var. Növbəti mövsüm üçün yeni komanda quracaqsınız?

- Yayda demək olar ki, sıfırdan komanda qurduq. Düzdür, I Liqadan gələn 9-10 futbolçu qaldı. Bu gün Arsen Ağcabəyov, Edqar Adilxanov meydanda idi. İndi üstünlüyümüz odur ki, bəzi legionerlərin müqaviləsi var. O qədər də əziyyət çəkməyəcəyik. Vasili ilə Bakiç komandada deyil, Brahim Konate "Zirə" ilə müqavilə bağlayıb. Yeni transferlər olacaq. Bir aydan çoxdur bu yöndə iş gedir. İnanıram ki, "Şamaxı"da qalsam, yaxşı komanda quracağıq.

- Növbəti mövsümdə "Şamaxı"nın hədəfi nə olacaq?

- İlk növbədə büdcəyə baxmaq lazımdır. Bu büdcə ilə desəm ki, hədəfimiz yuxarı pillələrdir, yalan danışaram. Amma keçən ilə baxanda təcrübəliyik. Yuxarı yerlərdə olmağa cəhd edəcəyik. Bu da əslində büdcədən asılıdır. Problemlər yəqin ki, yaxın günlərdə həll olunacaq.

- Mediada adınız "Sabah"la hallanır. Bu, nə dərəcədə doğrudur?

- İlk dəfə sizdən eşitdim. Bəzi çətinliklər var. İstədiyimiz olmasa, mən də riskə getmərəm. Bu mövsüm də risk etmişdim. Hər şey ola bilər.

- Dövlətin klublara ayırdığı vəsaitin məbləği azalacaq. "Şamaxı" bu büdcə ilə nəyə ümid edəcək?

- Klubların büdcələrini açıqladığını gördüm. Mənə görə o rəqəmlər tam deyil. Bir az da çoxdur. Bəzi komandaları bilirik. Demək ki, hər şeyi büdcəyə bağlamaq olmaz. Gələn mövsüm çox çətin olacaq. "Qəbələ"ni bilirik, təcrübələri çoxdur. "Karvan" və "İmişli"dən çox şey asılıdır. Çempionat üç dövrədən ibarət olacaq. Buna hazır olmaq lazımdır.

- Rəhbərlik əlavə maliyyə qaynaqları tapmaq üçün çalışır?

- Bəli. Bu işin içindəyəm. Rəhbərlik dayanmır. Bu rəhbərliklə çalışmaq mənim üçün xoşdur. Burada tam peşəkar gedir. Dəstək lazımdır. Hər şeyi turnir cədvəlinə bağlamayaq. Çempionata "Şamaxı" kimi komandalar lazımdır. Bu gün Rüfət, Edqar, Rauf kimi futbolçular milliyə namizəd görünürlər. Bu gün Cəfər debüt etdi. Gənc futbolçuları komandaya gətirmək istəyirik.