Ayxan Abbasov: “Vəziyyət yaxşı deyil”

“Maraqlı oyun alındı. Bilirdik ki, "Səbail" son matçlara final kimi yanaşır. Aqressiyaları, istəkləri görünürdü. "Araz-Naxçıvan"la görüşdə də pis oynamamışdılar. Önə keçəndən sonra epizodları dəyərləndirə bilmədik. Hesab 2:0 olsaydı, oyun bitəcəkdi. Penaltidən sonra üstünlük rəqibdən oldu. Bu da normaldır. 1 xal qazandıq. Bu gün azarkeşlər çox idi. Onlara 3 xal hədiyyə etmək istəyərdik. Məğlubiyyətsiz seriyamız davam edir. Bu stabilliyi ikinci dövrədə göstərə bilsəydik, bu gün başqa yerlər uğrunda oynayardıq. İldən-ilə təcrübə qazanacağıq. Çempionatda əsas işimizin öhdəsindən gəlmişik. Futbolçuların peşəkar yanaşması məni sevindirir”.

Futbolxeber.az saytının məlumatına görə, bu sözləri “Şamaxı”nın baş məşqçisi Ayxan Abbasov Azərbaycan Premyer Liqasının 33-cü turunda “Səbail”ə qarşı keçirilən oyundan (1:1) sonra deyib.

Daha sonra o, jurnalistlərin suallarını cavablandırıb:

- Edqar Adilxanovun zədəsi ciddidir?

- Xeyr. İnanmıram ciddi olsun.

- Müqaviləsi başa çatan legionerlərlə bağlı vəziyyət necədir?

- Gözləyirik. Büdcə tam bilinmir. Sponsorsuz komandayıq. Dövlətin ayırdığı pulla komandanı saxlamışıq. Yəqin yaxın günlərdə bəlli olar. Bəzi futbolçularla müqaviləmiz var. Heyəti qorumaq çətindir. Yenidən komanda qurmaq, seleksiya aparmaq bir məşqçi kimi mənim üçün çətin olacaq. Vəziyyət yaxşı deyil.

- Büdcənin bilinməməsi sizin üçün nə dərəcədə çətinlik yaradacaq?

- Builki işimizin öhdəsindən gəlmişik. Gələn mövsümə hazırlıq getməlidir. Biz gecikirik. Kömək olmasa, çox çətin olacaq.

- Büdcə qeyri-müəyyən olsa da, Rikardo Fernandeslə yeni müqavilə imzaladınız. Onunla necə razılığa gələ bildiniz?

- Bütün legionerlərlə danışırıq. Rikardo komandanın əvəzolunmaz simasıdır. Təklifləri var idi. Onunla razılığa gələ bildik.