Ayxan Quseynov: “Başa düşmürəm ki, o top qapıdan necə keçdi”

“Turan Tovuz”un yarımmüdafiəçisi Ayxan Quseynovun Futbolxeber.az saytına müsahibəsi

- Gərgin keçən oyunda sona yaxın buraxdığınız ardıcıl qollarla “Qarabağ”a uduzdunuz. 1:4 hesablı məğlubiyyət barədə nə deyə bilərsiniz?

- İstəyimiz çox idi. Lakin konsentrasiyamız çatmadı. Ucuz qollar buraxdıq. “Qarabağ”ın oyunçularının keyfiyyəti məlumdur. Səhv buraxan kimi, dərhal bundan istifadə edirlər. Kompakt oynaya bilmədik. Sonda bir qədər yorulduq və rəqib də bundan maksimum faydalandı.

- Cari mövsüm əvvəlki 3 oyunda “Qarabağ”a uduzmamışdınız. Budəfəki matçda fərqli nə baş verdi?

- Bir ara meydanda açıq futbol getdi. “Qarabağ”la belə oynamaq çox çətindir. Biz yaxaladığımız şansları boşa verdik. Rəqib isə əlinə düşən fürsətləri dəyərləndirdi. Matçın əvvəlində heç nədən qapımızda penalti gördük. Topun Hakmanın əlinə dəyməsi bizi pis vəziyyətdə qoydu. Hesabı bərabərləşdirsək də, səhvlər nəticəsində yenə qapımızda qol gördük. “Qarabağ” səhvləri bağışlamır.

- Hesabı bərabərləşdirəndən dərhal sonra qapınızda ikinci qolu gördünüz. Bu amil məğlubiyyətdə nə dərəcədə rol oynadı?

- Dediyiniz bu məqamın çox böyük rolu oldu. Hesabı bərabərləşdirdikdən sonra 10-15 dəqiqə dözə bilsəydik, bəlkə də nəticə fərqli olardı. Təəssüf ki, bizdə soyuqqanlılıq çatmadı. Halbuki hesabı bərabərləşdirmişiksə, psixoloji üstünlük bizdə olmalı idi. Başa düşmürəm ki, o top qapıdan necə keçdi. Düzdür, Nəriman qapıya qüvvətli zərbə endirdi, lakin küncdə idi, ona görə də topun necə qapıdan keçdiyini anlamıram.

- Yəqin ki, qapıçının səhvi oldu...

- Bilmirəm, dəqiq nə deyim. Amma istənilən halda oradan buraxılan top qapıçının səhvi ola bilər. Sadəcə mənə elə gəlir ki, qapıçı həmin anda topu görmədi.

- Bu gün “Araz-Naxçıvan” “Neftçi”yə qalib gəlsə, üçüncü yerlə aranızda xal fərqi 7 olacaq. Qarşıdakı 8 turda bu fərqi aradan qaldırmaq nə dərəcədə realdır?

- Qış fasiləsinə qədər “Araz-Naxçıvan”la aramızda xal fərqi 12-13 idi. İndi fərq bir qədər azalıb. Hətta deyərdim ki, bəzi görüşlərdə xallar itirməsəydik, “Araz-Naxçıvan”ı keçə də bilərdik. 8 tur var sona. Naxçıvan klubunun da qarşı çətin oyunları olacaq. Biz toparlanmalı və özümüzə gəlməliyik.

Fərəc Aslanov