Kevin Medina: “Çempionluğun taleyini həll etmək üçün hələ tezdir”

“Qarabağ”ın müdafiəçisi Kevin Medinanın Futbolxeber.az saytına müsahibəsi

- “Turan Tovuz” üzərində qazanılan qələbəni (4:1) necə şərh edərdiniz?

- Ümumi götürdükdə çox maraqlı oyun oldu. Xüsusən də azarkeşlər üçün. Hər iki komanda meydanda maksimum gücünü qoyub, qələbə qazanmağa çalışırdı. Yekunda istəyinə çatan tərəf biz olduq. Şadam ki, bu cür gərgin, maraqlı oyunda 3 xal qazandıq.  

- Nəhayət ki, “Qarabağ” bu mövsüm “Turan Tovuz”a qalib gələ bildi...

- “Turan Tovuz” çox yaxşı mövsüm keçirir. Komanda həqiqətən də tərifəlayiqdir. Düzdür, əvvəlki matçlarda da pis çıxış etməmişdik. Deyərdim ki, hardasa fortuna bizim tərəfdə deyildi. Bu dəfə isə hər şey bizim üçün yaxşı yekunlaşdı və qələbə qazandıq.

- Tovuz şəhər stadionundakı atmosferi bəyəndiniz?

- Burada əlavə şərhə ehtiyac yoxdur. Tovuz stadionunda həmişə anşlaq yaşanır. Belə şəraitdə oynamaq çox xoşdur. Ümid edirəm ki, digər stadionlarda da belə ab-hava olacaq. Yeganə çatışmayan cəhət kimi ot örtüyünün süni olmasını qeyd edərdim. Düşünürəm ki, ot örtüyü təbii olsa, hər şey daha da mükəmməl olar.

- Növbəti turda “Zirə” ilə qaşılaşacaqsınız. Demək olar ki, “Qarabağ” həmin matçda artıq çempionluğun taleyini həll edə bilər?

- Yox, çempionluğun taleyini həll etmək üçün hələ tezdir. Mövsümün sonuna 8 tur qalıb. Qarşıda çox vacib matçlar var. İndidən çempionluq barədə düşünmürük.

- Qarşıdan kubokun yarımfinalı gəlir. “Qarabağ”ın “qızıl dubl” etmək şansı nə dərəcədə realdır?

- İşimiz və məqsədimiz budur. Çalışacağıq ki, “qızıl dubl” edək. Mövsümü iki titulla başa vurmaq istəyirik.

Fərəc Aslanov