Ozobiç: “İndi kuboku yox, “Araz- Naxçıvan”la oyunu düşünürük”

“Bilirdik ki, “Səbail”in meydanında oynamaq çətindir. Həmişə belə olur. Budəfəki matç da istisna təşkil etmədi. Rəqib güclü müqavimət göstərdi. Buna baxmayaraq, çətin də olsa qalib gəldik və yolumuza davam edirik”.

Futbolxeber.az saytına müsahibəsində bu sözləri “Neftçi”nin yarımmüdafiəçisi Filip Ozobiç Azərbaycan Premyer Liqasının 27-ci turunda səfərdə “Səbail”i 2:1 hesabı ilə məğlub etdikləri oyun barədə danışarkən deyib.

O, matçın gedişində 2 top fərqi ilə önə keçdikdən sonra rəqibin daha üstün təsir bağışlamasının səbibini belə izah edib: “Arxayınlaşdığımızı demək olmaz. Sadəcə oyun belə alındı. 90 dəqiqə ərzində bu meydanda mübarizə aaprmaq çətindir. Üstəlik, bəzi futbolçularımız oruc da tuturlar. Bu da istər-istəməz oyuna təsir göstərir”.

34 yaşlı futbolçu fasilənin “Neftçi”nin xeyrinə olacağını düşünür: “Artıq məşqləri bərpa etmişik. Var gücümüzlə çalışırıq. Qarşıda hələ bir həftə vaxtımız var. İnanıram ki, bu fasilənin komandamıza xeyri olacaq. Qarşıdakı matçlara daha yaxşı hazırlaşacağıq”.

Ozobiç növbəti turda “Araz-Naxçıvan”a qarşı keçirəcəkləri matçdan da söz açıb: “Hər oyun çətin keçir. 100 faiz gücünü meydanda qoymalısan, əks halda qalib gəlmək qeyri-mümkündür. Odur ki, “Araz-Naxçıvan”la görüşə ciddi hazırlaşırıq. Qalib gəlmək üçün əlimizdən gələni edəcəyik”.  

Çempionat oyunundan sonra “Neftçi”ni kubokun yarımfinalı gözləyir: “Kuboka hələ vaxt var. İndi kuboku yox, “Araz-Naxçıvan”la oyunu düşünürük. Təbii ki, məqsədimiz finala yüksəlməkdir. Bunun üçün mübarizə aparacağıq”.

Fərəc Aslanov