AFFA-dan növbəti biabırçılıq

Qulaq gündə bir söz eşitməsə, kar olar deyiblər. İndi də AFFA elə bir vəziyyətə çatıb ki, gündə bir hoqqa çıxartmasalar, sanki gecəni rahat yata bilməyəcəklər.

Assosiasiyanın budəfəki “qəhrəman”lığı I Liqada keçirilən “Baku Sporting” - “Zaqatala” matçında yaşanıb. Belə ki, matçdan sonra görüşü izləyən apasport.az saytının jurnalisti İsmayıl Xeyrullayev qeyri-adi “qadağa” ilə üzləşib. Gənc həmkarımıza bildirilib ki, oyundan sonra kimdənsə müsahibə və ya açıqlama almaq üçün matçın AFFA nümayəndəsindən icazə almaq lazımdır. Halbuki bu, absurddur. Çünki İ.Xeyrullayevin insidentlə bağlı yazısında qeyd etdiyi kimi, bu, PFL əsasnaməsinin açıq-aşkar şəkildə pozulmasıdır:

“14. Matçların yayımının və kütləvi informasiya vasitələrinin (KİV) akkreditasiyasının təşkili:

Həmin maddənin 12-ci bəndi: Klublar bütün futbolçuların miks-zonadan keçidini təmin etməli və akkreditasiyadan keçmiş KİV nümayəndələrinin müsahibə ilə bağlı hər hansı müraciəti yekun qərardan asılı olmayaraq futbolçuların diqqətinə çatdırmalıdır. Futbolçu istəmədiyi halda müsahibə-açıqlamadan imtina edə bilər.

Bu qərarda AFFA nümayəndəsindən icazə hardadır?”

İ.Xeyrullayev haqlı olaraq biabırçı hadisənin səbəbkarları ilə bağlı tədbir görülməsini tələb edir. Yoxsa hər stadionun direktoru və ya AFFA gödəkçəli şəxs jurnalistlərlə belə danışacaqsa, işimiz var ki...

Hörmətli AFFA, ola bilər bu “qadağa”larınız əməkdaşlıq etdiyiniz saytlarla razılaşmanızda var. Amma biz bu cür biabırçı hallara heç vaxt göz yummayacağıq!

Futbolxeber.az