Emin Əmrullayev: “Neftçi” Azərbaycan futbolunun tarixidir, simasıdır”

“Neftçi”nin strateji inkişafı üçün bu müqavilə vacibdir. Klubun dayanıqlı inkişafı üçün də xeyli işlər görülməlidir. “Neftçi”nin qarşısında duran məqsədlərdən biri də sponsorların rəngarəngliyi, bir mənbədən asılılığı azaltmaqdır. Bu, Azərbaycan futboluna vacib töhfələrdən biridir”.

Futbolxeber.az saytının məlumatına görə, bu sözlər “Neftçi”nin Müşahidə Şurasının üzvü Emin Əmrullayev deyib.

“Neftçi” və “Palms Sports” arasında sponsorluq müqaviləsinin imzalanması tədbirində çıxış edən E.Əmrullayev qeyd edib ki, klub rəhbərliyi “ağ-qaralar”ın brend olaraq inkişaf etdirilməsini istəyir: “Neftçi” Azərbaycan futbolunun tarixidir, simasıdır. “Neftçi”nin brend olaraq inkişaf etdirilməsi klubun idarəçilərinin qarşısında duran əsas hədəflərdən biridir. Ola bilər bugünkü durum “Neftçi” azarkeşlərinin xoşuna gəlmir. Mən də həmişə demişəm, “Neftçi”yə yalnız birinci yer yaraşır. Burda iki yol var. Ya tez hansısa uğurun arxasınca qaçmalısan, ya da dayanıqlılığı təmin etməlisən. Bu da infrastrukturun, akademiyanın inkişaf etdirilməsi, dayanılqlılığın təmin edilməsidir. Biz uzunmüddətli nəticənin arxasına düşmüşük. Bu, vaxt alır və ətrafdakı insanlardan səbr istəyir. Lakin inanıram ki, tezliklə “Neftçi”nin durumu daha da yaxşılaşacaq”.