Felipe Santos: “Bu, penalti idi”

“Araz-Naxçıvan”ın yarımmüdafiəçisi Felipe Santosun Futbolxeber.az saytına müsahibəsi

- “Sabah”la matçda “Araz-Naxçıvan”ın 15 oyunluq məğlubiyyətsizlik seriyası qırıldı. Minimal hesablı yenilgini necə şərh edərdiniz?

- Çətin oyun alındı. Fikrimcə, biz qələbəyə daha yaxın idik. Qol vurmaq üçün çox şansımız oldu. “Sabah”ın isə cəmi bir epizodu var idi. Ondan da faydalandılar. Bu da futbolun tərkib hissəsidir.

- İkinci hissədə təkqapı oynadınız, hətta bir epizodda əvvəlcə top dirəyə dəydi, sonra isə rəqib futbolçu iki dəfə topu boş qapıdan çıxardı. Bütün bunları yalnız bəxtsizliklə əlaqələndirirsiniz?

- Həqiqətən də ikinci hissədə qol vurmaq üçün çox şansımız oldu. Amma heç cür bəxtimiz gətirmədi. Top qapıdan keçmək istəmirdi. Buna görə də çox çalışıb, çatışmayan cəhətlərimiz üzərində işləməliyik.

- Havanın çox soyuq olmasının oyununuza hər hansı təsiri oldu?

- Çox soyuq idi. Bu cür hava şəraitinə adaptasiya olmaq asan deyildi. Lakin bu, heç kimin günahı deyil. Şəraitə uyğunlaşmalıyıq.

- Birinci hissədə yerdə qaldığınız epizodda hakim simulyasiya etdiyinizə qərar verdi və sizi sarı vərəqə ilə cəzalandırdı. Həqiqətənmi o epizodda yalandan özünüzü yerə atmışdınız?

- Mənə görə bu, penalti idi. Rəqibin ayağıma endirdiyi zərbənin izi qalmışdı.

- Hətta gəlib ayağınızı dördüncü hakimə də göstərdiniz.

- Bəli. Həmin anda zərbənin izi aşkar görünürdü. Lakin hakim fərqli qərar qəbul etdi. Ümumiyyətlə, hakimlər bu matçda bir çox epizodları düzgün qiymətləndirmədilər.

- Gələn tur ilin son matçında “Qarabağ”la qarşılaşacaqsınız. Məhz Ağdam klubu ilə oyundan öncə uduzmaq komandanıza psixoloji cəhətdən mənfi təsir göstərməyəcək?

- Bizim üçün həmin matç finala bərabərdir. “Qarabağ”ın da nəyə qadir olduğunu bilirik. Lakin rəqib haqda düşünməməliyik. Hazırda liderik. Əlimizdən gələni də edəcəyik ki, qarşıdakı matçda qalib gələk.

- Şər deməsən, xeyir gəlməz. Yəqin razılaşarsınız ki, hətta “Qarabağ”a uduzub ili ikinci pillədə başa vursanız belə, bu, “Araz-Naxçıvan”ın üçün uğurlu nəticə hesab ediləcək. Çünki mövsümün əvvəlində heç kim komandadan bu cür uğurlu çıxış gözləmirdi...

- Məğlubiyyətə baxmayaraq, biz hazırda liderik. Bu yerə çox güc sərf edərək gəlib çıxmışıq. Ona görə də asanlıqla təslim olmayacağıq. Sona qədər çalışacağıq ki, ən üst pillələrdə qərarlaşaq. Ola bilər mövsümün əvvəlində çoxları “Araz-Naxçıvan”dan bu cür çıxış gözləmirdi. Lakin biz özümüzə, komandamıza inanırıq.

İbrahim Cəfərov