Sərtan Taşkın: “Hər epizodu dəyərləndirsəydik, hesab 10:0, 20:0 olardı”

“Sumqayıt”ın müdafiəçisi Sərtan Taşkının Futbolxeber.az saytına müsahibəsi

- Azərbaycan Premyer Liqasının IV turunda “Sabah”a qarşı keçirilən oyuna yaxşı başladınız, erkən qol vurdunuz, lakin yekunda meydanı məğlub tərk etdiniz. Lazımi nəticəni qazanmaq üçün nə çatışmadı?

- İstədiklərimizi meydanda edə bilmədik. Çalışırdıq baş məşqçimizin tapşırıqlarını yerinə yetirək. Bəzən alınırdı, bəzən yox. Alınmayan anlarda qapımızda qollar gördük.

- Kifayət qədər qol epizodu yarada bilsəniz də, dəyərləndirmək mümkün olmadı. Bunu nə ilə əlaqələndirmək olar?

- Futbolda belə hallar olur. Hər epizodu dəyərləndirsəydik, hesab 10:0, 20:0 olardı. Bu futboldur, bəzən şansları qaçırırsan. Komanda olaraq növbəti matçlarda əlimizdən gələni edəcəyik ki, qələbə qazanaq.

- Demək olar ki, “Sumqayıt”da stabillik çatışmır?

- Deməzdim ki, stabillik çatışmır. Səhvlərimizi analiz edəcəyik. Növbəti qarşılaşmalara hazırlaşacağıq.

- Səhvləri nədə görürsən?

- Şansları qaçırmaq hər komandada olur. Məsələn, “Qarabağ” “Turan Tovuz”la matçda epizodları boşa verdi, yekunda məğlub oldu. Bu o demək deyil ki, “Qarabağ”da stabillik çatışmır. Biz də çalışırıq ki, səhvlərimizi düzəldək.

- Növbəti turda Sumqayıtda “Araz-Naxçıvan”ı qəbul edəcəksiniz. Həmin matçdan gözləntilər nədir?

- “Araz-Naxçıvan”ı təhlil edəcəyik. Baş məşqçimiz lazımi göstərişlərini verəcək. Biz də əlimizdən gələni edəcəyik ki, Samir müəllimin tapşırıqlarını yerinə yetirək.

- V turun oyunlarından sonra çempionatda fasilə olacaq. Demək olar ki, toplarlanmaq üçün həmin müddət “Sumqayıt”ın lehinə olacaq?

- İnanıram ki, yaxşı olacaq. Məncə də, fasilə müddətinin komandamıza faydası dəyəcək.

Fərəc Aslanov