Kurban Berdıyevdən qələbə şərhi

“İki fərqli hissə izlədik. Birinci hissədə kifayət qədər aktiv oynadıq. İlk yarıdan razı qaldım. İkinci hissədə hesabı saxlamaq hissi oyunçulara daha çox təsir etdi. İstənilən halda "Sumqayıt" kifayət qədər keyfiyyətli futbolçulara malik komandadır. Fasilədən sonra bunu sübüt etdilər. İki güclü rəqibə qarşı oynadıq. Bundan sonra daha yaxşı olmağa çalışacağıq”.

Futbolxeber.az saytının məlumatına görə, bu sözləri “Turan Tovuz”un baş məşqçisi Kurban Berdıyev Azərbaycan Premyer Liqasının ikinci turunda “Sumqayıt”ı 1:0 hesabı ilə məğlub etdikləri oyundan sonra deyib.

Təcrübəli mütəxəssis daha sonra jurnalistlərin suallarını cavablandırıb:

- İkinci hissədə komandanızın müdafiəyə çəkilməsi taktiki gediş etdi, yoxsa rəqib size buna məcbur etdi?

- Birinci hissədə daha ürəkli oynayırdıq. Görünür ki, futbolçular üstünlüyü əldən verməkdən qorxdular. Çalışmalıyıq ki, bu hissi aradan qaldıraq. Süni örtükdə oynamağımız da buna təsir edən amillərdən biri idi.

- Narazı qaldığınız məqam nədir?

- İlk hissədəki oyunu ikinci yarıda da oynasaydıq, daha çox zövq alardım. Bəzi məqamlarda ürəklə pressinq etmədik. İkinci yarıda rəqib çox güclü görünürdü. Onların əvəzetmələri özünü doğrultdu.

- Hazırkı heyət avrokuboklar üçün yetərlidir?

- Biz oyundan-oyuna hazırlaşırıq. Qarşıda daha vacib matçımız var. Mövsümün sonunda necə olacağını görəcəyik.

- Hücum xətti üçün qolçu oyunçuya ehtiyac var?

- Otto Cona inanıram. Çox hərəkət edir. Görünən odur ki, bir az vaxt lazımdır. Məşqlərdə də özünü yaxşı göstərir. İnanıram ki, onda yaxşı mənada dəyişiklik olacaq.