Azərbaycan klubu ispan yarımmüdafiəçi transfer etdi - EKSKLÜZİV

Transfer çalışmalarını davam etdirən “Səbail” heyətini yeni futbolçu ilə gücləndirib.

Futbolxeber.az saytının əldə etdiyi məlumata görə, paytaxt klubu Qorka Larruseanı heyətinə qatıb. 31 yaşlı ispaniyalının mövqeyi yarımmüdafiədir.

Qorka Larrusea Arrien peşəkar karyerasına İspaniyanın aşağı liqa təmsilçisi “Gernika”da başlayıb. 8 il ərzində bu klubun heyətində 211 oyun keçirən futbolçu 18 dəfə fərqlənib. Daha sonra o, vətənində “Real Union” və “Amorebieta”da forma geyib.

2022-ci ildə karyerası ərzində ilk dəfə legioner həyatı yaşayan Qorka Larrusea Buxarest “Dinamo”suna transfer olunub. Rumıniya klubunun heyətində meydana çıxdığı 35 matçda “Səbail”in yeni transferi 5 qol vurub. Son olaraq isə Qorka Larrusea bu ilin ilk yarısını Bolqarıstanın “Etar” klubunda keçirib.