“Sabah”da rəhbər dəyişikliyi: Yeni prezident o olacaq - ÖZƏL

“Sabah” klubunda tezliklə prezident dəyişikliyi olacaq.

Futbolxeber.az saytının əldə etdiyi məlumata görə, klubun hazırkı prezidenti Maqsud Adıgözəlov vəzifəsindən ayrılmaq üzrədir.

Belə ki, aprelin 2-də AFFA-nın Hesabat-Seçki Konfransında İcraiyyə Komitəsinə üzv seçiləcək M.Adıgözəlov həm də icraçı vitse-prezident postuna təyin olunacaq. Məhz bu səbəbdən də o, AFFA-dakı işinə daha çox diqqət ayırmaq üçün “Sabah”dan gedəcək.

Artıq Maqsud Adıgözəlovun xələfinin də adı məlumdur. Belə ki, əldə etdiyimiz digər məlumata görə, “Sabah”ın yeni prezidenti Sərxan Hacıyev olacaq.

Hazırda AFFA-nın baş katibi postunu tutan S.Hacıyev tezliklə klubda fəaliyyətə başlayacaq. Aprelin 2-də baş katib vəzifəsi ilə vidalaşacaq S.Hacıyev də AFFA-nın Hesabat-Seçki Konfransında İcraiyyə Komitəsinə üzv seçiləcək.  

Futbolxeber.az