Cavid Hüseynov: “İstədiyimiz futbolu oynayıb həzz ala bilmədik”

“Minifutbolu daha əvvəl də dostlar arasında, həftədə bir dəfə yığışıb oynayırdıq. Bu gün ilk dəfə rəsmi matça çıxdıq”.

Futbolxeber.az saytına müsahibəsində bu sözləri minifutbol üzrə Azərbaycan çempionatının ilk turunda “Sumqayıt” üzərində 4:2 hesablı qələbə qazanan “İnter”in üzvü Cavid Hüseynov deyib.

O, indidən hansısa yer uğrunda mübarizə aparmağın komandası üçün tez olduğunu bildirib: “Maraqlı oyun alındı. Komanda şəklində hazır olmasaq da, daha da yaxşı çıxış edə bilərik. Bu turnirdə hansısa bir yer uğrunda mübarizə aparmaq hələ tezdir. Ancaq istəsək, bu da alınar”.

Qələbəyə baxmayaraq, veteran futbolçu matçdan istədikləri həzzi ala bilmədiklərini vurğulayıb: “İlk oyun olduğu üçün çox çətin idi. Məşqlərdə, yoldaşlıq oyunlarında bundan daha yaxşı idik. Bu matçda tam istədiyimiz futbolu oynayıb həzz ala bilmədik. 4:2 hesabı ilə qalib gəlsək belə. İnanıram ki, qarşıdakı matçlarda oyunumuzdan daha çox zövq alacağıq”.

Fərəc ASLANOV