Mark Tamaş: “Beşiktaş” üçün sürpriz hazırlayacağıq”

“Neftçi”nin müdafiəçisi Mark Tamaş UEFA Konfrans Liqasının ikinci təsnifat mərhələsinin cavab oyununda “Jelezçinar”ı 2:0 hesabı ilə məğlub etdikləri oyundan sonra Futbolxeber.az saytının əməkdaşının suallarını cavablandırıb.

- Qələbəni necə şərh edərdin?

- Evdə oynamaq xoşdur. İlk anlardan bir qədər ehtiyatlı oynayırdıq. Ancaq azarkeşlərimiz qarşısında qələbə qazanmaq niyyətində idik. Bu gün qalib gəlmək olduqca vacib idi.

- Belə gözəl atmosferdə oynamaq necə bir hissdir?

- Bu mənzərəni görmək xoşdur. Çox xoşbəxtəm ki, oyunumuzu izləməyə bu qədər insan gəlib. Baxmayaraq ki, bizim fan-klub bir qədər çılğındır, amma mən bunu xoşlayıram. Bu stadionda doğma meydanda ilk oyunumu keçirdim. Bu, mənimçün çox önəmlidir. Qələbə qazanmaq istəyirdim, buna da nail olduq.

- Komandada yeni oyunçulardansan və məlumdur ki, mövsümün əvvəlində ideal formada olmaq mümkün deyil. Qarşıda daha yaxşı Tamaş görə biləcəyik?

- Addım-addım yeni komandaya öyrəşməyə çalışıram. Yeni üslubda oyuna başlayırıq. Hər kəsin adaptasiyaya ehtiyacı var. Hər oyun daha da yaxşı olacağıq. Qarşıda "Neftçi"ni yeni üslubda görəcəyik.

- UEFA Konfrans Liqasının növbəti mərhələsində "Beşiktaş" kimi bir rəqiblə üz-üzə gələcəksiniz. Bu oyun barədə nə düşünürsünüz?

- Həmişə belə hallarla qarşılaşırsan. “Beşiktaş” güclü olsa da, belə böyük klubu təəccübləndirə bilərik. Bu, futboldur. Ümid edirəm ki, onlar üçün gözəl sürpriz hazırlayacağıq. İki oyunun sonunda hər şey ola bilər.

- Artıq sabah Azərbaycan Premyer Liqasında yeni mövsüm start götürür və ilk turda Gəncədə oynayacaqsınız. Rəqib komanda "Kəpəz", təmsil etdiyi Gəncə barədə məlumatlısınız?

- Sabahdan həmin oyuna hazırlaşmağa başlayacağıq. Bu, bizim üslubumuzdur. Hər şeyi addım-addım edirik. Həmin oyuna da köklənib qələbə qazanmağa çalışacağıq.

Azad NURİYEV