Emin Mahmudov: “Mutu bizdən başqa futbol tələb edir”

“Maraqlı oyun oldu. Rəqib yaxşı müdafiə olunurdu, biz isə çalışırdıq müdafiə xəttini yaraq. İlk hissədə rəqibi əks-hücumda yaxaladıq. Pressinqlə topu aldıq və hesabda önə keçdik. Hesabda önə keçdikdən sonra daha rahat oynadıq. İkinci qolu tez vursaydıq, işimiz daha asan olardı. İnanıram ki, gələcəkdə daha yaxşı çıxış edəcəyik”.

Futbolxeber.az saytının məlumatına görə, bu sözləri “Neftçi”nin kapitanı Emin Mahmudov “Jelezniçar” üzərində qazanılan 2:0 hesablı qələbəni şərh edərkən deyib.

Təcrübəli yarımmüdafiəçi Adrian Mutunun gəlişindən sonra “Neftçi”də hansı dəyişikliklərin olması barədə sualı belə cavablandırıb: “Ümumən keçmiş məşqçimiz barədə danışmaq istəməzdim. Lakin onu deyə bilərəm ki, Mutu bizdən başqa futbol tələb edir. Biz də çalışırıq ki, onun tapşırıqlarını yerinə yetirək. Komandanın neçə faiz dəyişməsi barədə nəsə deyə bilmərəm. Hələ tezdi, bunun üçün bir qədər vaxt lazımdı. Mutu daha çox topla oynamağı istəyir”.

Mahmudov qarşıdakı bir həftədə sıx qrafikdə oynamarına belə münasibət bildirib: “Əslində, gözləyirdim ki, “Kəpəz”lə oyunun yeri dəyişsin, ilk turda biz rəqibi öz meydanımızda qəbul edək. Gəncəyə getmək üçün uzun yol qət edəcəyik. Ardınca isə böyük ehtimalla “Beşiktaş”la oynayacağıq ki, bu matç bizim üçün çox çətin olacaq. Üstəlik, ilk oyun da səfərdədi. Buna görə güzəşt olmasını istərdim. Amma alınmırsa, problem yoxdu, oynayarıq. İndidən “Beşiktaş” barədə düşünməməliyik. İlk növbədə “Kəpəz”i məğlub etməliyik. Çünki çempionat başlayır və bu, bizim üçün vacib matçdı”.

O qeyd edib ki, yeni transferlərin gəlişi komandanın gücünə güc qatır: "Nə qədər yaxşı oyunçular komandaya cəlb olunsa, bu, yaxşıdır. Çünki güclü legionerlərin gəlişi ilə komandanın səviyyəsi qalxacaq”.

Azad NURİYEV