Elmar Baxşıyev: “Üzülmək yox, irəli baxmaq lazımdı”

“Maraqlı oyun alındı. Matçın sürəti, dinamikası yaxşı idi”.

Futbolxeber.az saytının məlumatına görə, bu sözləri “Qəbələ”nin baş məşqçisi Elmar Baxşıyev Azərbaycan Premyer Liqasının XIV turunda “Neftçi”yə qarşı keçirdikləri oyundan sonra deyib.

“CBC Sport”a açıqlamasında Baxşıyev komandasının 0:2 hesablı yenilgisini qol epizodlarını qaçırmaqları ilə əlaqələndirib:

“90 dəqiqə ərzində çoxlu qol epizodları yaxalasaq da, təəssüf ki, onlardan yararlana bilmədik. “Neftçi” isə əks-hücumlarda qollar vurdu”.

Yenilgiyə baxmayaraq, “Qəbələ”nin çalışdırıcısı komandasından narazılıq etməyib: “Komandanın çıxışından razıyam. Üzülmək yox, irəli baxmaq lazımdı. Daha çox çalışıb, yolumuza davam etməliyik”.

Elmar Baxşıyev vurğulayıb ki, komandası hər matçda 7-8 qol epizodu yaradır:

“Vəziyyəti dəyişməyə çalışırıq. Sürətli hücumlar qursaq da, dəyərləndirmədə axsadıq. Qol vurmayanda rəqibə şans yaradırsan, rəqib də bundan yararlanır. Daha çox çalışmaq lazımdı. Oyun ərzində 7-8 qol epizodu yaratsaq da, faydalana bilmirik. Səhvlərimizi düzgün analiz edib qarşıdakı görüşlərə daha yaxşı formada köklənəcəyik”.