“Neftçi”nin zədəlilərinin son durumu: Stankoviç “Zirə”yə qarşı oynamayacaq

“Neftçi”nin zədəli futbolçularının son durumuna aydınlıq gəlib.

Futbolxeber.az saytının məlumatına görə, klubun baş həkimi Şaiq Zöhrablı komanda üzvlərinin vəziyyəti barədə “Neftçi TV”yə açıqlama verib.

O qeyd edib ki, əməliyyat olunduğu üçün uzun müddətdir yaşıl meydanlardan kənarda qalan Sezar Meza Kolli artıq fərdi hərəkətlərə başlayıb.

Eddi İsrafilov və Mərt Çelik fərdi məşqlərlə kifayətlənirlər. Rəhman Hacıyev isə fiziki hazırlıq üzrə məşqçinin nəzarəti altında məşq keçir.

Azər Əliyev və Vato Arveladze, eləcə də son turda zədələnərək meydanı vaxtından əvvəl tərk edən Yusuf Laval komanda ilə məşqlərə qoşulub.

Lakin “Zirə” ilə oyundan öncə “Neftçi” daha bir aparıcı futbolçusunun xidmətindən məhrum olub. Ş.Zöhrablının bildirdiyinə görə, “ağ-qaralar”ın əsas mərkəzi müdafiəçisi Vojislav Stankoviç qripə yoluxduğundan bu gün meydana çıxa bilməyəcək. Serb futbolçu yalnız gələn həftədən komandanın məşqlərində iştirak edəcək.