“Qarabağ” - “Qəbələ”: 56-cı duel

Bu həftə Azərbaycan Premyer Liqasında VI turun oyunları keçiriləcək.

Futbolxeber.az saytının məlumatına görə, “Qəbələ” milli komandaların oyunları ilə əlaqədar yaranan fasilədən sonra ilk matçına çıxacaq.

“Qırmızı-qaralar” səfərdə “Qarabağ”la görüşəcək. Bu matç Bakıdakı “Azersun Arena”da keçiriləcək.

Paytaxtdakı qarşılaşma iki komanda arasında 56-cı matç olacaq. İndiyədək rəqiblər Premyer Liqada 46, Azərbaycan kubokunda 9 duelə çıxıblar. Bu 55 görüşdə 12 qələbə qazanan “Qəbələ” 18 heç-heçə edib. 25 dəfə isə Ağdam klubu qalib gəlib. 48 dəfə rəqib qapısına yol tapan “Qəbələ” 72 top buraxıb.

Premyer Liqa çərçivəsində 10 qələbə və 13 heç-heçəsi olan “qırmızı-qaralar” 23 dəfə uduzub. Rəqib top fərqində də öndədir - 64:41.

Rəqib meydanında 28-ci dəfə “Qarabağ”la üz-üzə gələcək “qırmızı-qaralar” əvvəlki 27 səfərdə 4 dəfə qalib gəlib. Hesabında 9 heç-heçə olan “Qəbələ” 14 dəfə uduzub. Səfərdə 20 dəfə rəqib qapısına yol tapan komanda 40 top buraxıb.

Xatırladaq ki, oktyabrın 17-də keçiriləcək “Qarabağ” - “Qəbələ” matçı saat 16:00-da başlayacaq.