Ağabala Ramazanov: “Bir-birimizi aldatmayaq. Rəqibimiz çox güclüdür”

“Vurduğum qollara görə sevinirəm. Hesaba gəldikdə isə sizin kimi mən də üzülürəm. Çünki evdə 3 top buraxmaq bizi məyus edir. Bilirik ki, səfərdə bu cür rəqiblə çox çətin olacaq. Amma cavab oyununa daha ciddi hazırlaşacağıq”.

Futbolxeber.az saytının məlumatına görə, bu sözləri “Səbail”in hücumçusu Ağabala Ramazanov Avroliqanın birinci təsnifat mərhələsinin ilk görüşündə "Universitetya Karayova"ya 2:3 hesabı ilə məğlub olduqları matçdan sonra jurnalistlərin suallarını cavanlandırarkən deyib.

“Fikirləşmirsən ki, hamı sənin kimi mübarizə aparsaydı, hesab başqa cür olardı?” sualını o, belə cavablandırıb:

“Bu, məşqçiyə aiddir. Mənim xarakterimi bilirsiniz. Çalışıram ki,  hər qarşılaşmada mübarizə aparım”.

Ağabala bugünkü məğlubiyyətdən sonar komandasının mərhələni keçmək şansının az olduğunu bildirib:

“Bir-birimizi aldatmayaq. Rəqibimiz çox güclüdür. Büdcə tərəfdən belə baxsaq, görərik ki, bizdən 5-6 qat üstündürlər. Çalışacağıq ki, ən azından yaxşı mübarizə aparaq, nəticə qazanaq”.