"Qəbələ" Litvadakı çıxışını darmadağınla başa vurdu

Litvanın paytaxtı Vilnüsdə keçirilən ənənəvi “Ateitis Cup” beynəlxalq turnirinə yekun vurulub.

Futbolxeber.az saytının məlumatına görə, “Qəbələ”nin 14 yaşadək futbolçulardan ibarət komandası yarışın son günündə 11-12-ci yerlər uğrunda matçda qüvvəsini sınayıb. “Qırmızı-qaralar” Belarusun “İsloç” klubu ilə qarşılaşıb. Ülfət Mədətovun komandası bu qarşılaşmada böyükhesablı qələbə qazanıb - 4:0. Komandanın qollarını Sərxan Mirzəzadə, Aslan Şirinov, Sahil Həsənov və Elmir Hüseynli vurub. Bu qələbə ilə “Qəbələ” turniri 11-ci pillədə başa vurub.

Futbolçu Emil Süleymanov “Ateitis Cup”ın ən yaxşı yarımmüdafiəçisi mükafatına yiyələnib. Yarışın qalibi adına isə İtaliyanın “Atalanta” klubu yiyələnib.

Xatırladaq ki, “Qəbələ” qrup mərhələsində yerli “Vilnüs”ə 2:0 hesabı ilə qalib gəlib (Sərxan Mirzəzadə - 2),  “Dauqavpils”ə 0:1 hesabı ilə uduzub, Finlandiya “Maski”si ilə 2:2 (Eşqin Əhmədli, Murad Ələkbərov), Belarus “Smena”sı ilə 0:0 hesablı heç-heçə edib. 9-12-ci yerlər uğrunda matçda isə komanda Estoniya “Levadiya”sına 0:1 hesabı ilə uduzub.